पोखरा, २९ भदौं । राष्ट्रिय स्वतन्त्र पार्टीले कारवाही गरी निष्कासन गरेका निवर्तमान सांसद डा.ढाका कुमार श्रेष्ठका विषयमा भ्रम फैलाउने गरी झुटा विषयहरु सामाजिक सञ्जाल फेसबुकमा लेखेको भन्दैं जिल्ला प्रहरी कार्यालय कास्कीले एकजनालाई पक्राउ गरेको छ ।

स्याङ्जा, आँधिखोला गाउँपालिका वडा नं. ५ ठुलीबराहा बस्ने ३५ वर्षीय सूर्यबहादुर रेग्मीलाई पक्राउ गरी विद्युतीय कारोबार ऐन, २०६३ विपरितको कसुर (साईबर अपराध) अन्तर्गत थप अनुसन्धान अगाडि बढाइएको प्रहरीले जनाएको छ ।

भदौं २२ गते बेलुकी रेग्मीले फेसबुकमा ‘राष्ट्रिय स्वतन्त्र पार्टीका निवर्तमान सांसद डा. ढाका कुमार श्रेष्ठलाई अज्ञात समूहले उनकै निवास अगाडी धारिलो हतियार प्रयोग गरी घाईते बनाएको र उनलाई उपचारको लागि मणिपाल शिक्षण अस्पताल लगिएको, अवस्था चिन्ताजनक रहेको डाक्टरबाट जानकारी, थप समाचार आउन बाँकी’ भन्दैं डा.श्रेष्ठको तस्विर सहित पोष्ट गरेका थिए ।

समाजमा अराजकता, आत्म सम्मानमाथि आघात पु¥याउने गरी भ्रम फैलाउने र जीउ ज्यानको सुरक्षामा समेत असर गर्ने खालको झुठ्ठा एवं अनर्गल प्रचार गरेको भन्दैं डा.श्रेष्ठले विद्युतीय कारोबार ऐन, २०६३ विपरितको कसुर (साईबर अपराध)मा जाहेरी दिएका थिए ।