पोखरा, २६ फागुन । पोखरा महानगरपालिकाको निर्देशनलाई पटक–पटक लत्याउँदै व्यापारी अशोक पालिखेले फिर्के खोलाको मापदण्ड विपरित खोलामाथि नैं संरचना निर्माण गरिरहेका छन् । महानगरपालिकाका नगरप्रहरीहरुले पटक–पटक सामान खोसेर ल्याउँदा समेत अटेर गर्दै व्यापारी पालिखेले खोलामाथि नै ग्याबिन भर्ने वाहनामा अतिक्रमण गरेका हुन् ।

स्थानीयले व्यापक विरोध गरेपछि पोखरा महानगरपालिकाका मेयर धनराज आचार्यसहितको टोलीले फिर्के खोला मिचेर व्यापारी पालिखेले बनाएको संरचनाको अनुगमन गरेको थियो । अनुगमनका क्रममा खोलामा डोजर (मेसिन) नै प्रयोग गरी गहिरो खाल्डा खनेर ग्याबिन भर्ने नाममा व्यक्तिले आफ्नो जमिन जोगाउन मापदण्ड विपरित काम गरेको देखिएको मेयर आचार्यले डन न्यूजसँग बताए ।

मेयर आचार्यले भने–‘कसले बनाएको हो, त्यो चाँहि मलाई थाहा भएन । तर फिर्के खोलाको भूँईमा नै मेसिन नै लगाएर खनिएको छ । भूँईबाट नै जग उठाएर त्यहाँ जाली लगाइएको छ । जसले गरेको भएपनि त्यो गलत काम हो ।’ ‘खोलामाथि लगेर ढुङ्गा थुपारिएको छ । त्यो नगर्नु । २ दिनभित्र जसले थुपारेको हो उसले उठाएर लगेनन् भने त्यसलाई जफत गर्नु भनेको छु,’ मेयर आचार्यको भनाई थियो ।

पोखरा महानगरपालिकाले फागुन २५ गते व्यापारी अशोक पालिखेको नाममा पत्र काट्दै तत्कालै निर्माण सामाग्री र संरचना हटाउन निर्देशन समेत दिएको छ । महानगरपालिकाका सहायक प्रमुख प्रशासकीय अधिकृत जीतेन्द्रजंग केसीले पोखरा महानगरपालिका वडा नं. १८ लाई समेत बोधार्थ पठाउँदै ३ दिन भित्र उक्त स्थानमा भएको निर्माण सामाग्री र निर्माण भएको संरचना हटाउनु नभए स्थानीय सरकार सञ्चालन ऐन २०७४ अनुसार कारवाही हुने चेतावनी सो पत्रमा दिइएको छ ।

यस विषयमा व्यापारी अशोक पालिखेले भने–‘फिर्के खोलाले हाम्रो जमिनको भित्ता तिर हान्यो, पोहोर पनि हान्यो अहिले पनि बाढी आउन सक्छ हान्छ भनेर जमिन मूनि मात्र संरचना बनाउन लागिएको हो । बाहिर मिच्नका लागि होइन र मिच्ने पनि छैनौं ।’

विवादित व्यापारी पालिखेले फिर्के खोला मिचेर पोखरा महानगरपालिकाको मापदण्डलाई लत्याएका मात्र छैनन्, मेयर आचार्यलाई ठाडै चूनौंती दिदैं आफ्नो काम निरन्तर अघि बढाईरहेका पनि छन् । तर मेयर आचार्यले दिएको अल्टिमेटम भित्र निर्माण भएका संरचना र थुपारिएका निर्माण सामाग्री नहटाएमा के हुन्छ, त्यो हेर्न भने बाँकी नैं छ ।

तर, पोखरामा व्यापारी पालिखेले सञ्चालन गरेका अन्य व्यवसायहरु समेत यस्तै विवादित हुँदै आईरहेका छन् । उनकैं संलग्नतामा सञ्चालित पोखराको गैह«ापाटनमा रहेको फिस्टेल हस्पिटल एण्ड रिसर्च सेन्टर पनि यसैको ज्वलन्त एक उदाहरण हो । पटक–पटक चरम लापरवाहीका कारण विरामीको मृत्यु हुँदा लाखौं रुपैयाँ क्षतिपूर्ति तिर्दै घटना गुपचुप बनाउने कार्यमा समेत व्यापारी पालिखेको टिमले निकै बदनाम कमाई सकेको छ । उनको संलग्नतामा सञ्चालित स्कुलदेखि कलेजसम्मका भवन निर्माण कार्य कुनै पनि तोकेको मापदण्ड भित्र नरहेको जानकारहरु बताउँछन् ।