रुपन्देही, ११ पुस । जिल्ला प्रहरी कार्यालय कास्कीमा सरुवा भएर आउँदै गरेका डीएसपी ठगबहादुर केसी ३५ तोला सुन र १८ लाख रुपैयाँसहित पक्राउ परेका छन् । इलाका प्रहरी कार्यालय बुटवलबाट रमाना लिएर डीएसपी ठगबहादुर कास्की आउने तयारीमा थिए ।

काठमाडौंबाट गएको केन्द्रीय अनुसन्धान ब्यूरो (सीआईबी)को टोलीले आइतबार साँझ केसीलाई निवासबाटै पक्राउ गरेको थियो । बुटवलका एक व्यापारीले ल्याएको सुन नियन्त्रणमा लिएर आफैंले राखेको र सुन फिर्ता गर्न उनले व्यापारीसँग नगद रकम लिएको भन्ने सुराकीकाआधारमा सीआईबीले छानबिन गरेको हो । उनको साथबाट १८ लाख नगद र ३५ तोला सुन फेला परेको सीआईबीका केन्द्रीय प्रवक्ता प्रहरी उपरीक्षक कमल थापाले जानकारी दिएका छन् ।

अनुसन्धानका क्रममा केसीले गत मंसिरमा बुटवलका एक व्यापारीले ल्याएको सुन नियन्त्रणमा लिएर राखेको र व्यापारीसँग २५ लाख रुपैयाँ लिएका थिए । तर डीएसपी ठगबहादुर व्यापारीलाई सुन फिर्ता गर्न नपाउँदै सीआईबीको टोलीको फन्दामा परेका छन् ।