पोखरा, १७ कार्तिक । जिल्ला प्रहरी कार्यालय कास्की मातहतका प्रहरीले पत्रकार विजय नेपालीमाथि आज दुर्व्यहार गरेका छन् । नयाँबजारस्थित प्रदर्शनी केन्द्रमा म्यादी प्रहरीलाई पोशाक बाँडिएको तस्विर खिच्न पुगेका पत्रकार नेपालीमाथि प्रहरीले ज्यादती गरेको हो ।

पत्रकार नेपालीका अनुसार प्रदर्शनी केन्द्रमा म्यादी प्रहरीलाई पोशाक बाँडिएको तस्विर मैले खिचेको थिए । तस्विरहरु सबै जबरजस्ती डिलेट गर्न लगाईयो । पुनः जिल्ला प्रहरी कार्यालय कास्कीका प्रवक्तालाई फोन गरेर अनुमति लिए । त्यसपछि पनि मलाई त्यहाँबाट तस्विरहरु खिच्न नदिई दुर्व्यहार गर्दै हटाईयो ।

पत्रकार नेपाली पोखराबाट प्रकाशित हुने ढोरपाटन दैनिकमा कार्यरत छन् । फोटो पत्रकार संघ कास्कीले पनि पत्रकार नेपालीमाथि प्रहरीले गरेको ज्यादतीको विरोध र भर्त्सना गरेको छ ।

पत्रकार विजय नेपालीले नयाँबजारस्थित प्रदर्शनी केन्द्रमा म्यादी प्रहरीलाई यसरी ड्रेस बाँड्दै गरेको यो तस्विर खिचेका थिए । जुन प्रहरीले डिलेट गरिदिएको थियो । पछि यो तस्विर पुनः ‘रिकभर’ गरिएको हो । तस्विर : विजय नेपाली