पोखरा, ११ वैशाख । नेपाली कांग्रेस कास्कीले गठबन्धनका दलहरुसँग पोखरा महानगरपालिका बाहेक कास्कीका अन्य स्थानीय निकायमा मैंत्रीवत रुपमा प्रतिस्पर्धामा जाने निर्णय गरेको छ । कास्की कांग्रेसका सचिव भानु ढकालले जारी गरेको विज्ञप्तिमा कार्यकर्ताहरु बिचको व्यापक असन्तुष्टि, कार्यकर्ताहरु र विभिन्न वडा इकाई सभापतिहरुको गठबन्धन नगर्ने राय, सुझावका कारण केन्द्रको निर्णय जिल्लाले हुबहु स्वीकार्न नसकेको उल्लेख छ ।
आज दिउँसो सत्तारुढ दलसहित पोखराको लेकसाईडस्थित होटल स्नोल्याण्डमा बसेको बैठकमा कांग्रेसका सयौं कार्यकर्ताहरु पुगी कांग्रेस सभापति किशोरदत्त बराल, सचिव भानु ढकाल लगायतको टोलीलाई नै जिल्ला पार्टी कार्यालयमा लगी सभापतिको कक्षमा ताला लगाएर ३ घण्टासम्म थुनेका थिए ।
कुनै पनि हालतमा गठबन्धन गर्न नहुने भन्दै रुष्ट भएका कार्यकर्ताहरुले पार्टी कार्यालय नै तोडफोड गर्न थालेपछि प्रहरी प्रशासनले सुरक्षा दिनु परेको थियो । सभापतिको कार्यकक्षमा थुनिएका नेताहरुले गठबन्धन मान्दैनौं र कार्यकर्ताहरुको चाहना अनुरुप अघि बढ्छौं भन्ने विज्ञप्ति जारी गरेपछि मात्र ताला खोलिएको सचिव भानु ढकालले जानकारी दिए ।