पोखरा, ९ वैशाख । पोखरा महानगरपालिकाको उपमेयर पदका लागि नेपाली कांग्रेस गण्डकी प्रदेशले १० जना उमेदवारको नाम केन्द्रमा सिफारिस गरेको छ । सत्तारुढ गठबन्धनको भागमा पोखराको मेयर नेपाल कम्युनिष्ट पार्टी (एकीकृत समाजवादी)लाई परेपछि उपमेयरमा कांग्रेसले आफ्नो उमेदवार छनौंट गर्न लागेको हो ।

बिहीबार बसेको प्रदेश समितिको बैठकले पोखरा महानगरपालिकाको उपमेयरमा लक्ष्मी पाण्डे क्षेत्री, माया बराल कार्की, आनन्दी राणा कार्की, रंगीला आचार्य, टीकाकुमारी गुरुङ, दीपक मल्ल, मिलन थापा, चिनु गुरुङ, गोविन्द नेपाली र शिव केसीको नाम सिफारिस गरेको हो ।

त्यसैगरी, पोखरा महानगरपालिका मेयरका लागि सिफारिस भएका १८ जनाको नाम गण्डकी प्रदेश समितिले रोकिदिएको छ । उपमेयरमा भने महानगर कमिटीले सिफारिस गरेका नामहरु जस्ताको तस्तै केन्द्रमा पठाएको हो ।

महानगर प्रमुखका लागि नगर समितिले कांग्रेसबाट बहालवाला मन्त्री विन्दुकुमार थापा, सुदीपमोहन भट्टराई, परमेश्वर पोखरेल, निर्मलप्रसाद कर्माचार्य, कृष्णबहादुर केसी, बाबुराम आचार्य, सरस्वती गुरुङ, नन्दप्रसाद तिवारी, गंगाधर पराजुली, वीरेन्द्र नारायण विजुक्छे, विश्वशंकर पालिखे, किशोरदत्त बराल, बाबुराम गिरी, गणेशबहादुर भट्टराई, कोपिला रानाभाट, किरण केसी, विश्व घिमिरे र ऋषि सापकोटाको नाम सिफारिस गरेको थियो ।