स्याङ्जा, ४ वैशाख । स्याङ्जाको वालिङ नगरपालिका–१२ डाँडाखर्कमा भएको जिप दुर्घटनामा परी मृत्यु हुनेहरु पाँचैजनाको सनाखत भएको छ । आज आइतबार बिहान अन्दाजी १० बजेको समयमा डाँडाखर्क गाउँबाट वालिङ बजारतर्फ आउँदै गर्दा ग १ ज ७३९९ नम्बरको जिप सडकबाट अन्दाजी १ सय मिटर तल खसेको थियो ।

दुर्घटनामा सात महिनाका गौरव सारु, उनकी आमा २५ वर्षीया शर्मिला सारु, ६५ वर्षीय वीरबहादुर दाला, ४५ वर्षीया हिरा दाला र ६१ वर्षकी कुलकुमारी कनौजेको मृत्यु भएको जिल्ला प्रहरी कार्यालय स्याङ्जाका प्रहरी निरीक्षक पदमराज थापाले जानकारी दिए । सबैजना मृतक र घाईते डाँडाखर्क गाउँका वासिन्दाहरु रहेका छन् ।

घाइते हुनेमा अन्दाजी ६० वर्षीय अंगबहादुर दाला, ५५ वर्षीया मायाकुमारी सारु, ३५ वर्षीया योगेन्द्र थापा, १८ वर्षीया नविना सारु, १९ वर्षीया लक्ष्मी दाला र ६० वर्षीया दलबहादुर थापा रहेका छन् । उनीहरुको पोखरास्थित गण्डकी मेडिकल कलेजमा उपचार भईरहेको छ ।

जिप चालक दलबहादुर, मायाकुमारी, लक्ष्मी र अंगबहादुर (चार जना)को अवस्था गम्भीर रहेको प्रहरीले जानकारी दिएको छ । घाईते मध्ये नविना र योगेन्द्रको अवस्था भने मध्यम छ । प्रहरीका अनुसार घाईतेहरुलाई छाती र टाउकोमा बढी चोट लागेको छ ।