ललितपुर, १५ चैत । विवेकशील साझा पार्टीमा संस्थापन पक्ष र असन्तुष्ट पक्ष बिच विवाद चर्किएको छ । आज असन्तुष्ट पक्षले ललितपुरको बखुन्डोलस्थित पार्टी कार्यालयमा पत्रकार सम्मेलनको आयोजना गर्न लागेको बेलामा अध्यक्ष रवीन्द्र मिश्र पक्षधरले अवरोध गरेपछि प्रहरीले नै सुरक्षा दिनुपर्ने स्थिति देखिएको हो ।

निर्देश सिलवाल नेतृत्वको असन्तुष्ट पक्षले सोमबार बैठक गरेर अध्यक्ष मिश्रलाई किन कारबाही नगर्ने भनेर तीनदिने स्पष्टीकरण सोध्ने निर्णय गरेको थियो । त्यसबारे जानकारी दिन पार्टी केन्द्रीय कार्यालय बखुण्डोलमा ११ बजे पत्रकार सम्मेलन आयोजना गरिएको थियो । यता, पार्टीले कार्यालयमा नवनियुक्त प्रदेश इन्चार्ज र प्रदेश संयोजकलाई शुभकामना दिने कार्यक्रम राखेको थियो भने उता, सोही समयमा संगठन विभाग प्रमुख सिलवाल लगायत असन्तुष्ट पक्षले पनि पत्रकार सम्मेलनको आयोजना गरेका थिए ।

त्यो कार्यक्रम रोक्न अध्यक्ष मिश्र पक्षले कर्मचारी बाहेक अन्यका लागि पार्टी केन्द्रीय कार्यालय बन्द गरेको सूचना जारी गरेको छ । अनधिकृत व्यक्तिहरुले कार्यक्रम गर्न खोजेको र त्यसको कारण उत्पन्न जोखिमलाई ध्यानमा राखी अनिश्चितकालका लागि कार्यालय बन्द गरेको सूचनामा उल्लेख छ ।

वैकल्पिक शक्ति भन्दै उदायको विवेकशील साझा पार्टी अन्ततः विजोग अवस्थामा पुगेको छ । सञ्चारकर्मी रवीन्द्र मिश्रको नेतृत्वमा रहेको पार्टी फुट र गुटमा विभाजित हुँदै जाँदा विवाद चर्किदैं गएको छ । सोचे भन्दा फरक धारमा पार्टीलाई लैजान थालेपछि मिश्रका विरुद्धमा पार्टी भित्रै चर्को आलोचना शुरु भएको हो ।