काठमाडौं, १४ चैत । आगामी वैशाख ३० मा हुने स्थानीय तह निर्वाचनमा निर्वाचन आयोगले साना दललाई पनि उनीहरूकै चुनाव चिह्न दिने निर्णय गरेको छ । राष्ट्रिय मान्यता प्राप्त दललाई मात्र तिनकै चुनाव दिने कानुनी व्यवस्थाले विभेद गरेको भन्दै साना दलले विरोध जनाउँदै आएका थिए । आयोगको शनिबार बसेको बैठकले साना दललाई पनि पार्टीकै चिह्न प्रदान गर्ने निर्णय गरेको हो ।

कानुनअनुसार राष्ट्रिय मान्यता प्राप्त एमाले, कांग्रेस, माओवादी केन्द्र, जनता समाजवादी पार्टी, एकीकृत समाजवादी र लोकतान्त्रिक समाजवादी पार्टीले मात्रै आफ्नै चिह्नमा चुनावमा भाग लिन पाउँथे । अन्य साना ७३ दलले स्वतन्त्र उम्मेदवारको हैसियतमा निर्वाचन आयोगले अन्तिममा दिएको चुनाव चिन्ह लिएर प्रतिस्पर्धा गर्नुपर्थ्यो । राष्ट्रिय मान्यता नपाएका दलहरूलाई संगठन रहेको जिल्लाको विवरण बुझाउन गत चैत ६ सम्म समय दिइएको थियो ।

स्थानीय तहको निर्वाचनका लागि ७९ दल दर्ता भएकामा सक्रिय रहेको जिल्लाको विवरण ५८ दलले मात्रै आयोगमा बुझाएका थिए । ५ वटाले जिल्लामा विवरण बुझाएका थिए । उनीहरूको विवरणका आधारमा चुनाव चिह्न दिन लागिएको आयोगले जनाएको छ ।