काठमाडौं, १३ चैत । नेपालको चर्चित धार्मिकस्थल देवघाटको त्रिशुली नदी र कालीगण्डकी नदीको दोभानमा ६३ करोडको लागतमा तीनमुखे पुल (ट्रिज) बन्ने भएको छ । देवघाटमा तीन जिल्ला (चिवतन, नवलपुर र तनहुँ) लाई जोड्ने गरी अर्को धार्मिक स्थल रिडीमा जस्तै तीनमुखे पुल बन्न लागेको हो ।

संघीय मामिला तथा सामान्य प्रशासन मन्त्रालयमातहतको स्थानीय पूर्वाधार विभागले यो आयोजनाको विस्तृत वातावरणीय प्रभाव मूल्यांकन प्रतिवेदन वन तथा वातावरण मन्त्रालयमा पेश गरिसकेको छ । आयोजनाको कुल लागत ६३ करोड ३५ लाख ७५ हजार ५ सय ४० रुपैयाँ अनुमान गरिएको छ । यो आयोजनाको आयु १ सय वर्ष रहने रहने गरी डिजाइन गरिएको प्रतिवेदनमा उल्लेख छ ।

अहिले यस क्षेत्रमा रहेका तीन जिल्लालाई एक साथ जोड्ने अर्को कुनै पनि संरचना छैन । चितवनको भरतपुर महानगरपालिका र तनहुँको देवघाट गाउँपालिकालाई त्रिशुली नदीमाथिको झोलुंगे पुलले जोड्छ । यता, गैंडाकोट नगरपालिकाको कैलाडी र हर्दी क्षेत्र भने जोडिएको छैन । यस्तो तीन मुखे पुलले तीन जिल्लालाई एक साथ जोड्ने प्रतिवेदनमा उल्लेख छ ।

यसअघि यस्तो डिजाइनको पुल गुल्मी, पाल्पा र स्याङ्जालाई जोड्ने गरी रिडी क्षेत्रमा बनिरहेको छ । यस्तो संरचना निर्माण हुने दोस्रो गन्तव्य देवघाट बन्ने भएको छ । यी दुई क्षेत्र धार्मिक दृष्टिकोणबाट नेपालका चर्चित गन्तव्यमा पर्दछन् । यी दुई क्षेत्रमा पुल निर्माण पश्चात् धार्मिक तथा आर्थिक गतिविधिमा समेत वृद्धि हुने आयोजनाको विश्वास छ ।