चुनावको विपक्षमा रहेका केन्द्रीय सदस्यहरुलाई फकाउनका लागि महासचिव विप्लव र प्रकाण्डले शुक्रबार र शनिबार बैठकै रोकेर जति प्रयास गरे पनि अन्नतः उनीहरु असफल भएका छन् ।

कपिलवस्तु, १३ चैत । नेपाल कम्युनिष्ट पार्टीको जारी केन्द्रीय समितिको बैठकमा महासचिव नेत्रविक्रम चन्द ‘विप्लव’को चुनाव उपयोगको प्रस्ताव अल्पमतमा परेको छ । महासचिव विप्लव र अर्का नेता खड्गबहादुर विश्वकर्मा ‘प्रकाण्ड’ले चुनावका पक्षमा राजनीतिक प्रतिवेदन पास गर्न अनेकौं प्रयास गरे पनि अन्त्यमा त्यो प्रयास विफल भएको छ ।

कपिलवस्तुको शिवगढीमा चैत ४ गतेदेखि जारी केन्द्रीय समितिको बैठकको आज सकिदैं गर्दा महासचिव विप्लवले प्रस्तुत गरेको राजनीतिक प्रतिवेदनमाथि उठेको प्रश्नको जवाफ दिने काम शुरु भएको छ । महासचिव विप्लवको स्थानीय चुनावको उपयोग गरेर जानुपर्ने मतलाई ६९ जनाको केन्द्रीय समितिमा ४० जना विपक्षमा उभिएका थिए भने २४ जनाले मात्र खुलेर पक्षमा समर्थन गरेका थिए । बाँकी सदस्यहरु भने तटस्थ रहेका थिए । त्यसो त सल्लाहकारहरु पनि अधिकांश चुनाव बहिस्कारको पक्षमा उभिएका थिए ।

चुनावको विपक्षमा रहेका केन्द्रीय सदस्यहरुलाई फकाउनका लागि महासचिव विप्लव र प्रकाण्डले शुक्रबार र शनिबार बैठकै रोकेर जति प्रयास गरे पनि अन्नतः उनीहरु असफल भएका छन् । एकीकृत जनक्रान्तिको नारा घन्काउँदै जनयुद्धका नायक पुष्पकमल दाहाल ‘प्रचण्ड’को राजनीतिक यात्रा महापतनतर्फ उन्मूख भएको भन्दै कडा आलोचना गर्ने महासचिव विप्लवले नै चुनावमा पार्टीलाई लैजान खोजेपछि पार्टी नेता तथा कार्यकर्ताहरुले खुलेरै यसको विरोध गरिरहेका थिए ।