माओवादी केन्द्रीय समितिमा प्रस्तावितमध्ये ५० जनाको नाम मात्रै अनुमोदन

काठमाडौँ, २३ फागुन । नेकपा (माओवादी केन्द्र)को केन्द्रीय समितिमा अध्यक्ष पुष्पकमल दाहालले ९७ जनालाई मनोनित गर्ने प्रस्ताव गरेकोमा ५० जनाको नाम मात्रै केन्द्रीय समिति बैठकबाट पारित भएको छ । ९७ जनाको सूचीमा अध्यक्ष प्रचण्डले छोरी गंगा दाहाल र ज्वाइँ जीवन आचार्य नाम समेत समावेश गरेका थिए । तर व्यापक विरोध भएपछि प्रचण्डका छोरीज्वाईको नाम अनुमोदन हुन पाएन ।

काठमाडौंमा जारी केन्द्रीय समितिको आज सोमबारको बैठकमा केन्द्रीय समिति सदस्यहरूले दाहाल र आचार्यलगायत ४७ जनालाई कुन आधारमा केन्द्रीय सदस्यमा मनोनित गर्न खोजेको भन्ने प्रश्न गरेका थिए । केन्द्रीय सदस्यहरुको व्यापक विरोधपछि ५० जनाको नाम मात्रै पारित भएको हो । जसमा महाधिवेशनमा केन्द्रीय प्रतिनिधि बनेका ३७ जना, ९ जना मधेसी र ४ जना दलित समूहबाट मनोनित भएका छन् ।

५० जना मनोनित भएसँगै माओवादी केन्द्रीय समिति सदस्य संख्या २ सय ९७ पुगेको छ । यसअघि २ सय ४७ सदस्यीय केन्द्रीय समिति थियो । आजको बैठकले केन्द्रीय समितिले कार्यविभाजन प्रस्ताव पारित गरेको छ । त्यसैगरी, पदाधिकारीका विषयमा व्यापक विवाद हुन सक्ने स्थिति देखेपछि बैठकले स्थानीय तहको निर्वाचन पछि मात्रै चयन गर्ने निर्णय गरेको छ ।