तनहुँ, २२ फागुन । दमौंली बजारस्थित हार्डवयर पसलमा लागेको आगो निभाउन नसकेपछि काठमाडौंबाट आएको सिम्रिक एयरको हेलिकप्टरले नजिकैको खोलाबाट पानी ओसारेर आगो निभाउन थालेको छ । जसले गर्दा आगो केही नियन्त्रणमा आएको स्थानीयले बताएका छन् ।

विहान १० बजेदेखि लागेको आगो निभाउन नसकेपछि गृह मन्त्रालयले पत्र लेखेर सिम्रिक एयरको सहयोग मागेको थियो । त्यसपछि काठमाडौंबाट हेलिकप्टर दमौली गएको हो । उक्त हेलिकप्टरमा क्याप्टेन इन कमाण्ड सुरेन्द्र पौडेल र क्याप्टेन राजेन्द्र दुवाल छन् । उनीहरुसँगै अग्नि नियन्त्रक टोली पनि रहेको सिम्रिक एयरका योगेश सापकोटाले जानकारी दिएका छन् ।

आगो लागेको ठाउँमा बाटो साँघुरो भएकाले दमकल पुग्न कठिन भएको थियो । दमकल नजिक लैजान बाटोमा पर्ने टहरो भत्काइएको छ । अहिले दमकल र हेलिकप्टर दुवैबाट आगो निभाउने प्रयास जारी छ ।

आगो लागेको स्थाननेर ३ वटा हार्डवयेर सँगै छन् । आगो अनियन्त्रित ढंगले बढिरहेको छ । दमकल छिर्ने ठाउँ साँघुरो भएकाले दमकल छिर्नै समस्या छ । दमकल छिर्ने ठाउँमा टहरो भएकाले भत्काएर दमकल पुर्याईएको छ । आगो निभाउन पोखराबाट दमकलहरु पठाइएको छ । आगलागी नियन्त्रणका लागि सुरक्षाकर्मी र स्थानीयहरुका साथै निजी पानी कम्पनिका गाडीहरु पनि खटिरहेका छन् ।