पोखरा, २२ फागुन । विजय ढकाल सहिद स्मृति प्रतिष्ठानको नेतृत्व माधव प्रसाद मिश्रले सम्हालेका छन् । प्रतिष्ठानको शनिबार भएको छैटौं अधिवेशनले मिश्रको नेत्वत्वमा ११ सदस्यीय नयाँ कार्यसमिति गठन गरेको हो । प्रतिष्ठानको उपाध्यक्षमा कल्पना चिलुवाल, महासचिवमा श्रीकृष्ण अधिकारी, सचिवमा किरण थापा र कोषाध्यक्षमा सिर्जना ढकाल छन् ।

सदस्यमा निर्मला न्यौपाने, राधा सापकोटा, राजु क्षत्री, राजेन्द्रमणि पौडेल, सुरज उपाध्याय र शालिकराम देवकोटा छन् । निवर्तमान अध्यक्ष राजेन्द्र पौडेलको संयोजकत्वमा बनेको अध्यक्ष मण्डलले नयाँ कार्यसमिति सर्वसम्मत चयन गरेको हो । प्रतिष्ठानका सल्लाहकार रामराज रेग्मी र संरक्षक विश्वप्रकाश लामिछाने अध्यक्ष मण्डलमा थिए ।

सल्लाहकार रेग्मीले सहिद विजय ढकाल नेपाली क्रान्ति र परिवर्तनसँग जोडिएको नाम रहेको उल्लेख गरे । उनले विजय ढकाल एक सच्चा क्रान्तिकारी भएको आंैल्याए । सहिदको बलिदानीबाट बनेको राजनीतिक पार्टीको नेतृत्व तहबाट सहिद, बेपत्ता, घाइते, अपांगहरुको बलिदानलाई अवमूल्यान गरिएको उनको गुनासो छ ।
उनले भने, ‘देशको आमूल परिवर्तन तथा राष्ट्रिय स्वाधीनताका पक्षमा र साम्राज्यवाद तथा विस्तारवाद नीतिका विरोधमा क्रान्ति हुन्छ । क्रान्ति मर्दैन । मर्न दिनु पनि हुँदैन । क्रान्ति एकले नगरे अर्कोले गर्छ ।’

प्रतिष्ठानका संरक्षक विश्वप्रकाश लामिछानेले सहिदको सपना र भावनालाई समातेर हिँड्नुपर्नेमा जोड दिए । सहिदको सपना र भावनालाई समाजका स्थापित गराउन आग्रह गरे ।

‘विजय ढकाल समाजका लागि एक सच्चा क्रान्तिकारी थिए । समाजमा क्रान्ति, प्रतिक्रान्तिकारी चलिरहन्छ । हाल, क्रान्ति होइन, प्रतिक्रान्ति चलेको छ । क्रान्ति उत्कर्षमा पुग्दा उन्मादमा र क्रान्ति ओझेलमा पर्दा निराशामा पर्ने व्यक्ति क्रान्तिकारी हुन सक्दैन,’ लामिछानेले भने ।

अध्यक्ष राजेन्द्र पौडेलको अध्यक्षतामा भएको कार्यक्रममा प्रतिष्ठानकी सदस्य कल्पना चिलुवाल, महासचिव भीम रानाभाट, कोषाध्यक्ष माधवप्रसाद मिश्र लगायतले बोलेका थिए । सहिद विजय ढकाललाई सबै सहिदको प्रतिनिधि पात्र मानेर सहिदको सम्मान एवं उनीहरुको त्याग र बलिदानलाई समाजमा स्थापित गराउने उद्देश्यले २०६३ मा प्रतिष्ठान स्थापना गरिएको हो ।

प्रतिष्ठानले पोखराको सहिदचोकस्थित सहिद पार्क, सहिद पार्कमा सहिदहरुको स्तम्भ र बेपत्ताहरुको स्मृतिमा प्रतीक्षालय निर्माण गरेको छ । प्रतिष्ठानले स्याङ्जाको सतौंमा समेत सहिदपार्क निर्माण गरेको छ ।