पोखरा, १३ फागुन । नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले पाँच दलीय गठबन्धन टुटेमा सबै धुलो पिठो हुने भन्दै व्यङ्ग गरेका छन् । ‘गठबन्धन टुट्न पनि हुँदैन’ अध्यक्ष ओलीले भने, ‘टुटिहालेमा बिचराहरू धुलोपिठो हुन्छन् ।’

आज शुक्रबार पोखरामा आयोजित पार्टी अगुवा कार्यकर्ता भेला तथा पार्टी प्रवेश कार्यक्रममा ओलीले आगामी निर्वाचनमा आफ्नो पार्टीले एक्लै प्रतिस्पर्धा गर्ने बताए । कार्यक्रममा अध्यक्ष ओलीले सम्बोधन गरिरहँदा मञ्चबाटै मोबाइलमा सत्तागठबन्धन जोगिने र एमसिसी पास गर्ने समाचार आएको जानकारी गराइएसँगै ओलीले थप आक्रोशित भएका थिए ।

आक्रोशित हुँदै अध्यक्ष ओलीले भने, ‘सिङ्गल–सिङ्गल भन्छन् नि, त्यो होइन, सामूहिक रूपमै आउन् हामीसँग लड्न । यहाँ साथीहरूले गठबन्धन जोगाउने र एमसिसी पास गर्ने निर्णय भएको समाचार भर्खर देखाउनुभयो । यसै गर्छन् भन्ने मलाई थाहा थियो । मैले चाहेको पनि त्यही हो । उनीहरू मिलुन् । नत्र धुलोपिठो हुन्छन् । उनीहरूको ताकत नै छैन हामीसँग सिंगल–सिंगल लड्ने, के गरून् ?’

कार्यक्रममा जनता समाजवादीका गण्डकी प्रदेश इन्चार्ज एवं केन्द्रीय सदस्य गणेशमान गुरुङलाई अध्यक्ष ओलीले नेकपा एमालेमा प्रवेश गराएका छन् । एमालेमा प्रवेश गरेका गुरुङ पहिलो संविधानसभा विघटन भएपछि १४ जेठ ०६९ सालमा एमालेका तत्कालीन उपाध्यक्ष अशोक राईसँगै एमालेबाट विद्रोह गरेर बनेको पार्टी संघीय समाजवादीमा लागेका थिए ।