काठमाडौँ । प्रहरी प्रधान कार्यालयले ३ जिल्लाका एसपीको काज सरुवा गरेको छ । प्रहरी प्रवक्ता विष्णुकुमार केसीका अनुसार चितवनमा नवराज अधिकारीलाई पठाइएको छ । महोत्तरीमा कृष्ण पङ्गेनी र बर्दियामा वीरेन्द्र शाहीलाई काज सरुवा गरिएको छ । १७ महिनादेखि एसपीको नियमित सरुवा हुन सकेको छैन । तर, प्रहरी प्रधान कार्यालयले नियमित सरुवा रोकेर काज सरुवा गरेको छ ।

चितवनमा कार्यरत ओम प्रसाद अधिकारीलाई अख्तियार, महोत्तरीमा कार्यरत दिनेश आचार्यलाई अपराध महाशाखा र बर्दियामा कार्यरत ईश्वर कार्कीलाई प्रहरी प्रधान कार्यालयमा सरुवा गरिएको छ ।

महोत्तरीमा सरुवा गरिएका पङ्गेनीले यसअघि बारा जिल्लाको कमाण्ड गरेका थिए । बाराबाट फर्केको केही समय अपराध महाशाखामा बसेका पङ्गेनीलाई फेरि मधेस प्रदेशकै जिल्लामा पठाइएको छ ।

२०७७ असारबाट कपिलवस्तुमा एकवर्ष काम गरेर फर्केका नवराज अधिकारीलाई चितवन सरुवा गरिएको छ । प्रहरी महानिरीक्षक शैलेस थापा क्षेत्रीले तराईबाट फर्केकालाई तराइको जिल्लामा कमाण्ड नदिने आचारसंहिता बनाएका थिए ।

तर, शक्तिकेन्द्रमार्फत दबाब दिएर दुवै एसपीले आकर्षक जिल्लामा काज गराएका हुन् । बर्दियामा सरुवा भएका शाहीले एसपीमा बढुवा भएपछि जिल्ला कमाण्ड गर्ने अवसर पाएका थिएनन् ।