पोखरा । नेकपा माओवादी केन्द्रको गण्डकी प्रदेश कमिटीको अध्यक्षमा शैलेन्द्र घिमिरे र दिपक कोइराला भिड्दैछन् । पोखरामा शनिबारदेखि शुरु भएको प्रदेश सम्मेलनमा आइतबार आज नयाँ नेतृत्व चयन गरिने हुँदा घिमिरे र कोइरालाले अध्यक्षको दावी गरिरहेका छन् ।

वर्तमान अध्यक्ष हरि अधिकारी ‘कुमार’ अध्यक्षमा पुनः नदोहोरिने भएपछि अध्यक्षको दाबेदारका रुपमा शैलेन्द्र र दिपक देखिएका हुन् । गण्डकी प्रदेश कमिटीका अध्यक्ष कुमारले आफू पुनः दोहोरिन नचाहेको अभिव्यक्ति सार्वजनिक गरिसकेका छन् । नयाँ नेतृत्वको लागि अहिले व्यापक छलफल चलिरहेको छ । आज सहमतिबाट नै नयाँ नेतृत्व चयन गर्नेमा माओवादी केन्द्र लागिपरेको छ ।

गण्डकी प्रदेश कमिटी अध्यक्षका दाबेदार घिमिरे स्याङ्जा जिल्ला इन्चार्ज हुन् भने अर्का आकांक्षी कोइराला पोखरा महानगरको अध्यक्ष हुन् । ११ वटा जिल्लाका प्रतिनिधिहरु सहभागि रहेको यस अधिवेशनले अध्यक्ष १, उपाध्यक्ष ३, सचिव १, सहसचिव ३ र कोषाध्यक्ष १ जनासहित २२९ सदस्यीय प्रदेश समिति निर्वाचित गर्नेछ ।

त्यसमध्ये कम्तीमा ३५ प्रतिशत महिला, २० प्रतिशत युवा, १९ प्रतिशत दलित, मुस्लिम तथा सीमान्तकृतहरुको प्रतिनिधित्व रहने छ । अधिवेशनमा प्रदेशका विभिन्न तहबाट निर्वाचित भएका ८ सय ४६ जना प्रतिनिधि सहभागी छन् । माओवादी केन्द्रको विधान अनुसार केन्द्रीय कमिटी सदस्यहरु जिल्ला वा प्रदेश समितिमा रहन नपाउने व्यवस्था रहेको छ । जसले गर्दा यसमा नयाँ अनुहार आउने निश्चित छ ।