पोखरा । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीले आठौं पार्टी पुनर्गठन दिवसका अवसरमा विभिन्न कार्यक्रमहरुको आयोजना गरेको छ । जस अन्तर्गत नेकपाले सोमबार मोटरसाईकल ¥यालीको आयोजना गरेको छ । पार्टीको केन्द्रीय कार्यक्रम अनुसार स्थानीय तहसम्म विभिन्न कार्यक्रमहरु गर्दै आठौं पार्टी पुनर्गठन दिवस मनाईएको हो ।

पोखराको पृथ्वीचोकबाट शुरु भएको ¥याली सभागृहचोक हुँदै चिप्लेढुङ्गा, सिदार्थचोक, जिरो किलो मिटर, हल्लनचोक, लेकसाईड, मिलनचोक, एयरपोर्ट परिक्रमा गर्दै पृथ्वी राजमार्ग अन्तर्गत अमरसिंह चोक, बिजयपुल, बुढिबजार, अर्घौ, तालचोकहुँदै शिशुवा चोकमा पुगी कोण सभामा परिणत भएको थियो ।
पार्टी पुनर्गठन दिवसको उत्सवमा निकालिएको उक्त ¥यालीमा नेकपा जिन्दावाद !, एकीकृत जनक्रान्ति जिन्दावाद !, महान सहिद अमर रहुन् !, वेपत्ताको खोजी गर !, बैज्ञानिक समाजवाद जिन्दावाद !, दलाल संसदीय ब्यवस्था खारेज गरौँ जस्ता नाराहरु लगाईएको थियो ।

यस्तै देशव्यापी आयोजना गरिने कार्यक्रम अन्तर्गत नेकपाले मंगलवार ७ गते खेलकुद, अतिरिक्त क्रियाकलापमा कविता, लोकगीत, वक्तृत्व कलालगायत कार्यक्रमहरू आयोजना गर्ने भएको छ ।

त्यसैगरी मंसिर ८ गते विहान चोकचोकमा पार्टीका झन्डा र पार्टी पुनर्गठन दिवसका व्यानर टाँगिने र त्यस दिन अबिर जात्रा, चियापान र युवा मार्च गरिने नेकपा कास्कीका ईञ्चार्ज उमा भूजेलले जानकारी दिईन् । इञ्चार्ज भूजेलले भनिन्–‘साँझ बजार, चोक र घरघरमा दीप प्रज्वलन गरेर साथै उपहार आदानप्रदान गरी पार्टी पुनर्गठन दिवस मनाउन सबैमा अनुरोध गर्दछु ।’