काठमाडौँ । उपमेयर कप राष्ट्रिय महिला लिग छनोटमा आज बिहीबार तीन खेल हुँदैछ ।

सातदोबाटोस्थित अखिल नेपाल फुटबल संघ (एन्फा) मा हुने पहिलो खेलमा अहिले हुम्लाको सिमकोट गाउँपालिका र काठमाडौं महानगरपालिका भिड्दैछ ।

समूह ‘इ’अन्तर्गतको सो खेल प्रतियोगिताको दोस्रो दिन हुनुपर्ने तालिका रहेपनि प्राविधिक कारणले रोकिएपछि ११ गतेको लागि सारिएको थियो ।

यसअघि काठमाडौं महानगरपालिकाले समूहको पहिलो खेलमा इलामको रोङ गाउँपालिकासँग बराबरी खेल्दै अंक बाँडेको थियो । रोङ गाउँपालिकाले पनि सिमकोट गाउँपालिकाविरुद्ध जित निकाल्दै दुई खेलबाट चार अंक जोडेको रोङ समुहको शीर्षस्थानमा छ ।

आजको दोस्रो खेल दिउँसो १२ बजे समूह ‘आइ’ अन्तर्गत सुनसरीको बराहक्षेत्र नगरपालिका र कञ्चनपुरको वेदकोट नगरपालिकाबीच हुनेछ । दुवै टोलीको यो पहिलो खेल हो ।

अन्तिम खेल दिउँसो ३ बजे धरान उपमहानगरपालिका र सुनकोशी गाउँपालिकाबीच हुनेछ ।