काठमाडौं । प्रधानमन्त्री शेरबहादुर देउवाले मन्त्रिपरिषद विस्तार गरेका छन्। प्रधानमन्त्री देउवाले झन्डै तीन महिनापछि आज मन्त्रिपरिषद विस्तार गरेका हुन्। गठबन्धनबाट नेपाली कांग्रेसका सभापति देउवा गत असार २९ गते प्रधानमन्त्री भएका थिए।

देउवाले यसपालि कसैलाई पनि उपप्रधानमन्त्री बनाएका छैनन्। उनले यसअघि कांग्रेसबाट तीन मन्त्री र एक राज्यमन्त्री बनाएका थिए भने नेकपा माओवादी केन्द्रबाट दुई जनालाई मन्त्री बनाएका थिए। अरू मन्त्रालय करिब तीन महिना देउवाले आफैँसँग राखेका थिए।

सत्तारूढ गठबन्धनका तर्फबाट कांग्रेस, माओवादी, जनता समाजवादी, नेकपा (एकीकृत समाजवादी) लाई समेटेर देउवाले आज मन्त्री बनाएका हुन्। नवनियुक्त मन्त्रीहरूको सपथ आजै अपरान्ह गरिने भएको छ।

देउवाले स्वास्थ्य तथा जनसंख्या राज्यमन्त्री रहेका उमेश श्रेष्ठलाई प्रधानमन्त्री तथा मन्त्रिपरिषद कार्यालयमै राख्ने भएका छन्। साथै यसअघि कानुन मन्त्री रहेका ज्ञानेन्द्रबहादुर कार्कीको जिम्मेवारी हेरफेर गरेर सञ्चार मन्त्रालयमा पठाइएको छ।

मन्त्री बने प्रधानन्यायाधीश राणाका जेठान हमाल

प्रधानमन्त्री शेरबहादुर देउवाले झन्डै तीन महिनापछि मन्त्रिपरिषद् विस्तार गरेका छन्। शुक्रबार दुई राज्यमन्त्रीसहित १८ मन्त्री नियुक्त भएका छन्। तीमध्ये १७ जना संघीय संसदका सदस्य हुन् भने एक जना सांसद नभएका व्यक्ति मन्त्री बनेका छन्। सांसद नरहेका गजेन्द्र हमाललाई प्रधानमन्त्री देउवा उद्योग, वाणिज्य तथा आपूर्ति मन्त्रालयको जिम्मा दिएका छन्।

हमाल प्रधानन्यायाधीश चोलेन्द्रशमशेर राणाका जेठान हुन्। उनी प्रधानन्याधीशको कोटामा मन्त्री बन्न लागेको चर्चा केही दिनदेखि चलेको थियो। नेपाली कांग्रेसभित्र सांसद रहेका अरू थुप्रै आकांक्षी भए पनि देउवाले हमाललाई नै मन्त्री बनाएका हुन्। संविधानको व्यवस्थाअनुसार सांसद नरहेको व्यक्ति छ महिनासम्म मन्त्री हुन पाउँछ।

हमाल परिवार बाँकेबाट कांग्रेसको राजनीतिमा सक्रिय छ। गजेन्द्र २०५३ देखि ५६ सालसम्म बाँके जिल्ला कांग्रेस सभापति थिए। उनका भाइ सुरेन्द्र हमाल पनि लुम्बिनी प्रदेशका प्रदेशसभा सदस्य छन्।