पोखरा । गोठबाट तीन वर्षको बाच्छी चोरेर काटेको अभियोगमा प्रहरीले तीनजनालाई पक्राउ गरेको छ । प्रहरीले बाच्छी काटेको अभियोगमा वागलुङ निसीखोला गाउँपालिका वडा नं. ६ घर भई हाल पोखरा–१९ पुरनचौर बस्ने २८ बर्षीय असारी घती मगर, २२ बर्षीय सबिन बुढामगर र २१ बर्षीया अस्मिता बुढामगरलाई मंगलबार (हिजो) पक्राउ गरेको छ ।

पोखरा वडा नं. १९ पुरनचौरका ८३ बर्षीय केशरबहादुर अधिकारीको गोठबाट गाईको बाच्छी दाम्लो फुकाई मंगलबार हिजो विहान करिब विहान साढे नौं बजे चोरी गरी लगिएको थियो । बाच्छी गोठबाट नै चोरी भएपछि प्रहरीलाई खबर गरिएपछि खोजतलास गर्दा गोठदेखि २ किलोमिटर पर लगि ती तीनजनाको समूहले काटेको भेटिएको प्रहरीले जानकारी दिएको छ ।

यसअघि पोखरामा एउटा समूहले सडकमा छोडिएका गाईहरुको पुच्छर काटिदिने, गाईको शरिरमा गहिरो चोट लाग्ने गरी हतियारले हान्ने र मारिदिने लगायतका घटनाहरु निकै बढिरहेको थिए । पछिल्लो समय भने यस्तो अपराध कम भएका छन् । तर यस्ता घटनामा संलग्न दोषी को हो भनेर प्रहरीले पत्ता लगाउन भने सकिरहेको छैन । दुध दिने बेलासम्म गाई पाल्ने र दुध दिन छाडेपछि सडकमा छाड्ने प्रवृत्तिले एकातिर गाईले दुःख पाउँदै आएको छ भने अर्को तर्फ सडक दुर्घटना पनि निम्त्याई रहेको छ ।

गाईलाई भगवान् ठानेर पुजा गर्ने प्रचलन भएपनि गाईबाट फाईदा हुन छाडेपछि सडकमा छाड्ने प्रवृत्तिले यस जनावरले निकै दुःख पाईरहेको छ । यसतर्फ पनि सम्बन्धित निकायले सोधखोज गरेर कारवाही गर्न जरुरी छ ।