पोखरा । पोखरा महानगरपालिका वडा नं. १८ मेथलाङ्गस्थित कच्ची सडक खण्डबाट एक कार तल खोंचमा खस्दा चालकको उपचारका क्रममा मृत्यु भएको छ । कारमा सवार दुईजनाको भने उपचार भईरहेको गण्डकी प्रदेश प्रहरी कार्यालय पोखराले जनाएको छ ।

प्रदेश प्रहरी कार्यालयका प्रहरी वरिष्ठ उपरीक्षक नरबहादुर केसीका अनुसार मृत्यु हुनेमा कारचालक नवलपरासी घर भई हाल पोखरा–९ न्यूरोडमा बस्ने ४४ बर्षीय बद्रीबहादुर खत्री रहेका छन् । बाँकी दुई जनाको भने उपचार भईरहेको र अवस्था सामान्य रहेको छ । कारमा चालकसहित तीनजना सवार रहेकोमा दुई महिलाहरु थिए । प्रहरीका अनुसार घाइते भएका महिलाहरुमा सपना घोताने र किरण अर्याल रहेका छन् ।

दिउँसो २ बजे एकजना युवतीसहित मेथलाङ्गको रक गार्डेनमा गएका उनले पछि अर्की युवतीलाई बोलाएका थिए । प्रत्यक्षदर्शीका अनुसार रक गार्डेनबाट साँझपख निस्किएका उनीहरु त्यहीँ मेथलाङ्गको अर्को रेष्टुरेण्टमा पुगेका थिए । त्यहाँबाट राती १०/११ बजे फर्किन लाग्दा गाडी उल्टो बाटो तर्फ लगेर भीरबाट खसेको प्रत्यक्षदर्शीले बताए । गाडी भीरबाट खसेपछि त्यहाँ रहेका युवतीहरु मध्ये १ जनाले प्रहरीलाई राती नै खबर गरेको विहानपख घाईते अवस्थामा भेटिएकी युवतीले बताएको स्थानीयहरुको भनाई छ ।

तर प्रहरी आएर खोज्दा कहीँ कतै नदेखेपछि राती प्रहरी फर्किएको थियो । मेथलाङ्गको डाँडाबाट गाडी यति तल खसेको थियो कि सजिलैसँग माथिबाट देख्न सकिदैंनथ्यो । विहानपख सोही गाडीमा सवार एकजना युवतीले प्रहरीलाई विहानपख पुनः खबर गरेपछि प्रहरीले घाईतेहरुको उद्धार गरेको थियो । रातभरी पानी परेको अवस्थामा मादक पदार्थ सेवन गरेर कार हाँक्न खोज्दा बद्रीले बाटो समेत ठम्याउन नसकेको आशंका स्थानीयले गरेका छन् ।

आज विहान करिब ६ बजे ग१च ७२३४ नम्बरको कार आफैं अनियन्त्रित भई सडकबाट दुईसय मिटर तल खोंचमा खसेको प्रहरीको भनाई छ । तर स्थानीयहरुले उनीहरु राती रेष्टुुरेण्टबाट १०/११ बजेको समयमा निस्किएको बताएका छन् । । के कारणले गाडी अनियन्त्रित भयो वा गाडीमा सवारहरुले मादकपदार्थ सेवन गरेका थिए वा थिएनन् भन्ने विषयमा प्रहरीले अनुसन्धान अगाडि बढाएको छ । यो घटना मदिरा सेवन गरेर अचेत अवस्थामा बाटो बिराउँदा भएको दुर्घटना थियो वा सुनियोजित थियो भन्ने विषयमा प्रहरीले पक्राउ परेका युवतीहरुसँग र दिनभर भएका त्यहाँका गतिविधिहरुको बारेमा अनुसन्धान गर्नुपर्ने देखिन्छ ।

मेथलाङ्ग डाँडा वरपर रहेका अधिकांश रेष्टुरेण्टहरुमा प्रहरी चेकिङ पनि नहुने र पोखराबाट आवात–जावात गर्न सजिलो हुने भएकोले त्यहाँ रमाईलो गर्ने बाहनामा विभिन्न अन्य गतिविधिहरु खुलेआम हुने गर्दछन् । स्थानीयहरुका अनुसार प्रहरीले त्यस ठाउँमा शुक्रबार र शनिबारको समयमा चेकिङ राम्रोसँग गर्ने र गलत गतिविधि हुने होटल तथा रेष्टुरेण्टहरुमा छापा मार्ने हो भने यस्ता घटनाहरु नदोहोरिने स्थानीयहरु नै बताउँछन् ।

मोजमस्तीका साथै गलत गतिविधिहरु गर्नेहरुका लागि मेथलाङ्ग वरपरका होटल तथा रेष्टुरेण्टहरु सुरक्षित गन्तव्य बनेका छन् । समयमा नै जिल्ला प्रहरी कार्यालय कास्कीले त्यस क्षेत्रमा आफ्नो उपस्थिति र अनुगमन नबढाउने हो भने अन्य ठुला दुर्घटनाहरु नहोलान् भन्न सकिन्न ।