लमजुङ । लमजुङको दोर्दी गाउँपालिकामा सेनाले तटबन्ध निर्माण गरेको छ । लमजुङको उदीपुरमा रहेको नेपाली सेनाको श्रीजङ गणले दोर्दीमा तटबन्ध निर्माण गरेको हो ।

हिलेवजार र फलेनी माविलाई बाढिपहिरोबाट जोगाउन श्रीजङ गणका सह सेनानी रमेश अधिकारीको कमाण्डमा खटिएको ३५ जनाको सेनाको टोलीले स्थानियको सहयोगमा वस्ती जोगाउन ९० वटा ढुङगाको ग्याविन जाली राख्ने कार्य गरिरहेको छ ।

जिल्ला विपद् व्यवस्थापन समितीले असार १ को बाढिले क्षति पुराएको दोर्दी ८ को हिलेवजारसँगै विद्यालय भवन जोगाउन सेनालाई तटबन्ध निर्माणको जिम्मा दिइएको लमजुङका प्रमुख जिल्ला अधिकारी होमप्रसाद लुईटेलले बताए ।

बाढिपहिरोपछि सेनाले अस्थायी तटबन्ध निर्माण, अस्थायी पुल निर्माण, अवरुद्ध भएका सडक सञ्चालन गर्ने र जोखिममा रहेका स्थानीयलाई सुरक्षित स्थानमा स्थानान्तरण गर्ने कार्य गरिरहेका छन् ।

असार १ गते दोर्दीखोलामा आएको बाढीले दोर्दी गाउँपालिका ८ हिलेवजारसहित खोला किनारमा रहेका २० घर बगाएको छ । बाढीले हिलेबजारको एक सामुदायिक भवनसहित २० घर बगाएको दोर्दी गाउँपालिकाका अध्यक्ष ओमबहादुर गुरुङले बताए ।

त्यस्तैगरी दोर्दी गाउँपालिकाले बाढी प्रभावित र बाढीको जोखिम रहेको हिलेबजारस्थित दोर्दी खोलामा तत्कालै तटबन्ध निर्माण गर्ने निर्णय गरेको दोर्दी गाउँपालिकाका अध्यक्ष ओमबहादुर गुरुङले बताए ।

उनका अनुसार गाउँपालिकाले ‘प्रकोप व्यवस्थापन कोष’बाट ५ लाख रुपैयाँ छुट्याएको छ । यस्तै, बाढीका कारण दोर्दी गाउँपालिका वडा नं ६, ७ र ८ मा रहेका विभिन्न सडकखण्ड अवरुद्ध भएकाले त्यस सडक खुलाउनका लागि पनि बैठकले ५ लाख रुपैयाँ विनियोजन गरेको छ ।

बाढीले घर बगाएपछि विस्थापीत भएका बाढिपहिरो प्रभावित हाल फलेनी माविमा आश्रय लिइरहेका छन् । दोर्दीका बाढी विस्थापित र जोखिममा रहेकालाई जतिसक्दो चाडो सुरक्षित स्थानमा टहरा बनाई स्थानान्तरण गरिने दोर्दी गाउँपालिकाका उपाध्यक्ष दिलबहादुर घलेले बताए ।