पोखरा । राष्ट्रिय जनमोर्चा गण्डकी प्रदेशसभाका सदस्य कृष्ण थापाले पार्टीको ह्वीपलाई लत्याउँदै विपक्षी कांग्रेस, माओवादी र जसपा गठबन्धनको पक्षमा हस्ताक्षर गर्न अस्वीकार गरेका छन् । सांसद थापाले हस्ताक्षर गर्न अस्वीकार गरेको जनमोर्चाका गण्डकी प्रदेश प्रमुख शंकर बरालले पुष्टि गरेका छन् ।

वैशाख २६ गते गण्डकी प्रदेशका मुख्यमन्त्री पृथ्वीसुब्बा गुरुङले राजीनामा दिएपछि ३ दिन भित्रमा नयाँ सरकार गठनका लागि प्रदेश प्रमुख सीता पौडेलले आह्वान गरेकी थिईन् । ६० सदस्यीय प्रदेश सभामा बहुमतका लागि जनमोर्चाका तीन सांसदको पनि समर्थन चाहिन्छ ।

जनमोर्चाको केन्द्रीय समिति कांग्रेस, माओवादी र जसपा गठबन्धनको नयाँ सरकार गठनको पक्षमा छ । सोही अनुसार सचेतक पियारी थापाले बाँकी दुई सांसद थापा र शाहीलाई सो सहमतिमा हस्ताक्षर गर्न ह्वीप जारी नै गरेकी थिईन् । तर सांसद थापाले पार्टी कैं निर्देशन अस्विकार गरेका छन् ।

कृष्णचन्द्र नेपाली पोखरेलको नेतृत्वमा नयाँ सरकार गठनको प्रयासमा रहेका नेपाली कांग्रेस, माओवादी केन्द्र र जनता समाजवादी पार्टीका नेताहरुले ३१ प्रदेशसभा सदस्यको हस्ताक्षर प्रदेश प्रमुखलाई बुझाउने तयारी गरेका थिए । तर जनमोर्चाका सांसदहरुले हस्ताक्षर नगर्दा यतिबेला विपक्षीहरु अन्यौंलमा परेका छन् ।

गण्डकी प्रदेशको ६० सदस्यीय प्रदेश सभामा एमालेको २८, कांग्रेसका १५, माओवादीका १२, जसपाका २ र जनमोर्चाका ३ जना सांसद छन् । कांग्रेस, माओवादी, जसपा गठबन्धन र एमालेको समान २८/२८ संख्या पुगेको अवस्था छ । बहुमतका लागि निर्णायक मत जनमोर्चाको पोल्टामा रहेको छ ।

यदि जनमोर्चाका सांसदले समय सीमा भित्र विपक्षी गठबन्धनलाई सहयोग गरेनन् अल्पमतको सरकार बन्ने निश्चित छ । प्रदेशसभामा सबैभन्दा ठुलो दल एमाले भएका कारण संसदीय दलका नेता पृथ्वीसुब्बा गुरुङ नै मुख्यमन्त्री बन्ने अवस्था बन्नेछ । मुख्यमन्त्री गुरुङले अल्पमतको सरकार बनाई रहँदा ३० दिन भित्रमा यसले पनि विश्वासको मत लिन सक्नुपर्नेछ ।