काठमाडौं । अन्ततः नेकपा एमाले विभाजनको संघारमा पुगेको छ । नेकपा एमालेका अध्यक्ष एवम् प्रधानमन्त्री खड्गप्रसाद ओलीको दम्भका कारण सत्ताच्यूत मात्र नभई एमाले विभाजित हुने अवस्थामा पुगेको हो । दुई तिहाईको कम्युनिष्ट सरकार नै छिन्न भिन्न हुँदै अन्ततः एमाले नै फुटको नजिक आईपुगेको छ ।

शुरुमा प्रधानमन्त्री ओली र तत्कालिन नेकपाका अर्का अध्यक्ष पुष्पकमल दाहाल ‘प्रचण्ड’ बीच बढेको आन्तरिक कलह सर्वोच्च अदालतमा पुग्दा नेकपा एमाले र माओवादी केन्द्र अलग–अलग हुन पुगेका थिए । त्यसपछि नेकपा एमाले भित्रैको विवाद चुलिएर आज लगभग पार्टी फुटको संघारमा आईपुगेको हो ।

नेकपा एमालेका वरिष्ठ नेताहरु माधवकुमार नेपाल र झलनाथ खनाल समूहलाई पेल्दै अस्तित्व विहिन अवस्थामा पु¥याएका अध्यक्ष ओलीसँग एकतालाई बचाई राख्न अन्तिम चरणमा राष्ट्रपति विद्यादेवी भण्डारीदेखि शीर्ष र दोस्रो तहका नेताहरु व्यापक छलफलमा जुटेका थिए । तर कुनै पनि सहमति भने हुन सकेन ।

यतिबेला नेकपा एमालेका नेता झलनाथ खनाल र माधवकुमार नेपाल समूहका सांसदहरुको बैठक बस्दैछ । नेपाल र खनाल समूहका नेताहरुले ‘कठोर निर्णय’का लागि बैठक बस्न लागेको सञ्चारमाध्यमहरुलाई बताएका छन् । सो बैठकका लागि वरिष्ठ नेता माधवकुमार नेपाल पनि सिंहदरबार पुगिसकेका छन् ।

यसअघि आइतबार भएको छलफलमा आज बिहान ९ बजेसम्मका लागि प्रधानमन्त्री ओलीलाई नेपाल र खनाल समूहले अल्टिमेटम दिएको थियो । तर प्रधानमन्त्री ओलीले सो अल्टिमेटका विषयमा कुनै पनि जवाफ नदिएपछि अहिले नेपाल र खनाल समूहका नेताहरुको बैठक बसिरहेको छ । बैठक लगत्तै सामूहिक राजीनामा दिदैं औपचारिक रुपमा नै एमाले विभाजित हुने स्थिति देखा पर्न सक्नेछ ।