दमौली । भूमिहिन सुकुम्बासी, भूमिहीन दलित र अव्यवस्थित वसोवासीको तथ्याङ्क सङ्कलनका लागि गणक घरदैलोमा पुगेका छन् । तनहुँ जिल्लाका विभिन्न स्थानीय तहमा गणकलाई भूमिहिन सुकुम्बासी, भूमिहीन दलित र अव्यवस्थित वसोवासीको तथ्याङ्क सङ्कलनलाई परिचालन गरिएको हो ।

भूमिसम्बन्धी समस्या समाधान आयोगले गत माघ ९ गते सार्वजनिक सूचना प्रकाशन गरी विवरण उपलब्ध गराउन सर्वसाधारणलाई अनुरोध गरिसकेको छ । सोहीबमोजिम सम्बन्धित स्थानीय तहले नियुक्त गरेका गणक उक्त तथ्याङ्क सङ्कलनका लागि परिचालित भएका छन् ।

पहिलो चरणमा कार्यसम्पादन भएका स्थानीय तहमा ३५ दिनभित्रमा सबै सुकुम्बासी, भूमिहीन र अव्यवस्थित वसोवासीको प्रारम्भिक विवरण सङ्कलन गरिने आयोगका केन्द्रीय सदस्य एकबहादुर रानाले जानकारी दिनुभयो । अहिले जिल्लामा पनि आयोगका पदाधिकारी नियुक्त भइसकेकाले जिल्लास्थित आयोगसँग समन्वय गरेर विवरण सङ्कलन र पुष्टिको काम गरिने रानाले बताउनुभयो ।

उहाँका अनुसार आँबुखैरेनी, घिरिङ, ऋषिङ र म्याग्दे गाउँपालिकासँग केही दिनअघि कार्यसम्पादन सम्झौता गरिएकाले ती स्थानीय तहमा पालिकास्तरीय, वडास्तरीय र तथ्याङ्क सङ्कलन एकाइ गठन गरिने छ । यसअघि आयोगले व्यास नगरपालिका, शुक्लागण्डकी नगरपालिका, भानु नगरपालिका, भीमाद नगरपालिका, देवघाट गाउँपालिका र बन्दीपुर गाउँपालिकासँग सम्झौता गरेको थियो ।

देवघाट गाउँपालिकाका प्रवक्ता यालबहादुर गुरुङले वास्तविक भूमिहीन, सुकुम्बासी र अव्यवस्थित वसोवासीको तथ्याङ्क सङ्कलनका लागि गणकहरुलाई घरदैलोमा खटाइएको जानकारी दिनुभयो । व्यास नगरपालिकाले पनि प्रत्येक वडामा भूमिहीन दलित, भूमिहिन सुकुम्बासी र अव्यवस्थित वसोवासीको तथ्याङ्क सङ्कलनका लागि गणक परिचालन गरिसकेको प्रमुख प्रशासकीय अधिकृत डिल्लीराम सिग्देलले जानकारी दिनुभयो ।

व्यास नगरपालिकाका तथ्याङ्क एकाई प्रमुख विमल गिरीका अनुसार नगरपालिकाका १४ वटै वडामा तथ्याङ्क सङ्कलक खटाइएको छ । उनीहरुले वडा कार्यालयबाट भूमिहीन दलित, सुकुम्बासी र अव्यवस्थित वसोवासीको विवरण सङ्कलन गर्नेछन् । उहाँका अनुसार भूमिहीन दलित, भूमिहिन सुकुम्बासी र अव्यस्थित वसोवासीले आफूले बसोबास गरेको वा आवाद कमोत गरेको जग्गा पाउन आयोगले तोकेको ढाँचा बमोजिम निवेदन फारम भरी लगत सङ्कलक वा सम्बन्धित वडा कार्यालयमा बुझाउनु पर्नेछ ।

भूमिहीन दलित, भूमिहीन सुकुम्बासी र अव्यवस्थित वसोवासीको पहिचानका लागि जिल्लाका स्थानीय तहले पनि काम शुरु गरेका छन् । सरकारले भूमि आयोगको जिल्ला अध्यक्षमा दधिराज सुवेदी तथा सदस्यहरुमा दीर्घबहादुर दरै र शान्ति कुँवरलाई नियुक्त गरिसकेको छ । सरकारले अगाडि बढाएको उक्त अभियानलाई सहयोग पु¥याउन जनप्रतिनिधिले काम गर्ने व्यास नगरपालिकाका प्रमुख बैकुण्ठ न्यौपाने बताउनुहुन्छ ।