पोखरा । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीको भातृ संगठन अखिल क्रान्तिकारी पृथ्वीनाराण क्याम्पस जिल्ला समिति कास्कीको छैटौं जिल्ला सम्मेलनमार्फत्  नयाँ नेतृत्व चयन भएको छ । उपेन्द्र परियारको अध्यक्षतामा १७ सदस्यीय समिति आज गठन भएको हो ।

कार्यक्रममा बोल्दै प्रमुख अतिथि अखिल क्रान्तिकारीका केन्द्रीय सदस्य बद्रीले देश र जनताको मुक्तिका लागि सम्पूर्ण विद्यार्थीहरु एकजुट भएर अघि बढ्नु पर्नेमा जोड दिनुभयो ।

त्यसैगरी कार्यक्रमका विशेष अतिथि नेकपा कास्कीका सेक्रेटरी विश्वासले एकीकृत जनक्रान्ति मार्फत् मात्र जनताको मुक्ति सम्भव रहेको र अहिलेको संसदीय व्यवस्था ध्वस्त पार्न देशभरका युवा र विद्यार्थीहरु संगठित रुपमा जुट्न आह्वान गर्नुभयो ।

कार्यक्रममा अखिल क्रान्तिकारीका व्यूरो संयोजक अटलले शैक्षिक क्षेत्रमाथि देखिएका विकृति र विसंगतिको अन्त्यका लागि अखिल क्रान्तिकारीमात्र एक विकल्प र शक्ति भएकोमा जोड दिनुभयो ।

त्यसैगरी अखिल क्रान्तिकारीका केन्द्रीय सदस्य एवम् युवा नेता प्रकाश बाँस्तोला ‘मार्शल’ले शैक्षिक माफिया र त्यसलाई संरक्षण गर्ने हरेक तप्का र संस्थामाथि अखिल क्रान्तिकारीले धावा बोल्दै आएको र पोखरामा देखिएका शैक्षिक विकृतिहरुको भण्डाफोरमा समेत अखिल क्रान्तिकारी सदैव अग्रणी भागमा रहेको दावी गर्नुभयो ।

अखिल क्रान्तिकारी पृथ्वीनाराण क्याम्पस जिल्ला समिति कास्कीका नवनिर्वाचित अध्यक्ष उपेन्द्र परियारले राज्यको दमन र अत्याचारका विरुद्धमा अझै सशक्त ढंगले प्रतिरोध गर्ने र सोही अनुसारका कार्यक्रमहरु पनि सञ्चालन गर्ने प्रतिवद्धता व्यक्त गर्नुभयो ।