पोखरा, २१ साउन । जिल्ला प्रहरी कार्यालय कास्कीले पोखरामा लागूऔषध ब्राउन सुगर (खैरो हिरोइन)सहित एक जना भारतीय नागरिकलाई पक्राउ गरेको छ।

जिल्ला प्रहरी कार्यालय कास्कीका प्रहरी नायव उपरीक्षक तथा सूचना अधिकारी वीरेन्द्र कुमार पासवानका अनुसार हिजो बुधबार दिउँसो करिब ४ बजे पोखरा वडा नं. ८ सिर्जनाचोकमा लागूऔषध बिक्री-वितरण भइरहेको सूचनाका आधारमा लागूऔषध नियन्त्रण व्यूरो शाखा कार्यालय पोखराबाट खटिएको टोलीले कारबाही गरेको हो।

पक्राउ पर्ने व्यक्ति भारतको मोतिहारी जिल्ला पूर्वी चम्पारण स्थायी बसोबास भएका ४० वर्षीय चन्देश्वर महतो हुन्। उनी हाल पोखरा महानगरपालिका वडा नं. ८ सृजनाचोकमा मण्डल खाजा घर सञ्चालन गरी बसिरहेका थिए। उनको पसलबाट डिजिटल तराजुमा तौल गर्दा १४०.७७ ग्राम ब्राउन सुगर जस्तो देखिने पदार्थ बरामद भएको प्रवक्ता डीएसपी पासवानले जानकारी दिएका छन् ।

बरामद लागूऔषधसहित निजलाई पक्राउ गरी जिल्ला प्रहरी कार्यालय कास्कीबाट प्रारम्भिक अनुसन्धान गरिएको छ। लागूऔषधसम्बन्धी कसुरमा कास्की जिल्ला अदालतबाट म्याद थप गरी अनुसन्धान प्रक्रिया अगाडि बढाइएका प्रवक्ता डीएसपी पासवानले बताए ।