लमजुङ, असार ३२ । लमजुङमा केही दिनअघि मृत फेला परेका ५७ वर्षीय बुद्धिबहादुर बोहराको हत्यामा संलग्न रहेको आरोपमा प्रहरीले दुई जनालाई पक्राउ गरेको छ। लुटपाटको उद्देश्यले आफ्नै साथीबाट उनको हत्या भएको प्रारम्भिक अनुसन्धानबाट खुलेको छ।

जिल्ला प्रहरी कार्यालय लमजुङका अनुसार, बेंसीसहर–८ तामाङ टोलका ५७ वर्षीय बोहरा असार २१ गतेदेखि बेपत्ता थिए भने असार २५ गते उनको शव बेंसीसहर–१ स्थित भीरपानी सामुदायिक वनमा फेला परेको थियो। प्रहरीले घटनाको अनुसन्धान गर्दै दोर्दी गाउँपालिका–१ का ३० वर्षीय विजय लामिछानेलाई पक्राउ गरेको छ।

प्रहरी अनुसन्धानमा लामिछाने र मृतक बोहरा निकै मिल्ने साथी रहेको खुलेको छ। घटनाको दिन दुवै जना सँगै रहेका र लामिछानेकै आग्रहमा जंगलतर्फ गएको पाइएको छ। आर्थिक समस्याका कारण बोहराले लगाएको सुनको सिक्री र औंठीमा लोभिएर लामिछानेले चिलाउनेको रुखको हाँगाले प्रहार गरी उनको हत्या गरेको प्रहरी प्रमुख डीएसपी जितेन्द्रकुमार बस्नेतले जानकारी दिए।

हत्यापछि लामिछानेले लुटेको करिब साढे दुई तोला सुन चितवनको भरतपुर–२१ स्थित मौलाकालिका सुनचाँदी पसलका सञ्चालक ४३ वर्षीय दीपक विश्वकर्मालाई बिक्री गरेको खुलेको छ। सो सुन ६ लाख ४४ हजार रुपैयाँमा खरिद–बिक्री गर्ने सहमति भएको र ४४ हजार रुपैयाँ तत्काल भुक्तानी गरिएको अनुसन्धानबाट पत्ता लागेको छ। सुन खरिद गर्ने व्यवसायी विश्वकर्मालाई पनि प्रहरीले नियन्त्रणमा लिएको छ।

सुरुमा घटना अस्वीकार गरेका लामिछानेले पछिल्लो बयानमा अपराध स्वीकारेपछि प्रहरीले दुवै जनालाई पक्राउ गरेको हो। जिल्ला अदालतबाट ५ दिनको म्याद थप गरी उनीहरूविरुद्ध कर्तव्य ज्यान र चोरी मुद्दामा अनुसन्धान अघि बढाइएको प्रहरीले जनाएको छ।