जनकपुरधाम, २५ असार । सरकारसँग भएका पूर्वसहमतिहरू कार्यान्वयन नभएको भन्दै मिटरब्याज पीडितहरूले पुनः सडक संघर्ष सुरु गरेका छन्। ‘मिटरब्याज विरुद्ध किसान-मजदुर आन्दोलन नेपाल’को ब्यानरमा देशभरका पीडितहरूले बिहीबार जनकपुरधामको तिरहुतिया गाछीबाट काठमाडौँ केन्द्रित तेस्रो चरणको पैदल मार्च सुरु गरेका हुन्।

आन्दोलनको औपचारिक सुरुवात गर्दै पीडितहरूले फर्जी तमसुक र मसाल जलाएर राज्यको ध्यानाकर्षण गराएका छन्। पैदल मार्च सुरु गर्नुअघि आयोजित सभालाई सम्बोधन गर्दै किसान-मजदुर आन्दोलनका अध्यक्ष अवधेश कुशवाहाले यो पटकको संघर्ष निर्णायक हुने दाबी गरे। ‘सरकारसँग चार पटकसम्म सहमति भइसकेको छ, तर कार्यान्वयनको पाटो निकै फितलो रह्यो। हाम्रा मागहरू सम्बोधन नभएसम्म यो संघर्ष रोकिने छैन,’ उनले भने।

यस पटकको पैदल मार्चमा हाल ३५ जिल्लाका ४०० भन्दा बढी पीडितहरू सहभागी छन्। नवलपरासी, सर्लाही लगायतका जिल्लाबाट आएका पीडितहरूले आफूले लिएको ऋणभन्दा तेब्बर बढी रकम चुक्ता गरिसक्दा पनि साहुको ज्यादती र अदालतका मुद्दाले उठिबास लगाएको गुनासो पोखेका छन्।

जनकपुरमा जम्मा भएका पीडितहरूले आन्दोलन अवधिभरको बस्ने र खाने खर्चसमेत आफैं संकलन गरिरहेका छन्। उनीहरू बढीमा १५ दिनभित्र काठमाडौँ पुग्ने तालिका रहेको जनाएका छन्। बाटोमा थप पीडितहरू जोडिने क्रम जारी रहने र काठमाडौँ पुग्दा आन्दोलनले थप ठूलो रूप लिने आयोजकको भनाइ छ।

पीडितहरूले फर्जी लिखत खारेज गर्नुपर्ने, मिटरब्याज विरुद्ध शक्तिशाली विशेष ऐन निर्माण गरिनुपर्ने, छुट्टै न्यायधिकरणको गठन गर्नुपर्ने र सुदखोरहरूको सम्पत्ति छानबिन गरी पीडितलाई फिर्ता गरिनुपर्ने लगायतका माग राखेका छन्।

यसअघि पनि सरकारले मिटरब्याज पीडितको समस्या समाधान गर्न विभिन्न आयोग र कार्यदल गठन गरे पनि समस्याको जरो उखेलिन सकेको छैन। गत फागुन २९ गते तत्कालीन सरकार र पीडित पक्षबीच भएको ४ बुँदे सहमति समेत कार्यान्वयन नभएपछि पीडितहरू पुनः सडकमा आउन बाध्य भएका हुन्।

आन्दोलनकारीहरूले सरकारले समयमै ठोस पहल नगरे काठमाडौँमा थप सशक्त आन्दोलन गर्ने चेतावनी दिएका छन्। पटक-पटकको आश्वासनबाट आजित बनेका पीडितहरू यस पटक भने ‘छिनोफानो’ नभई नफर्कने अडानमा देखिन्छन्।