दाङ, २१ जेठ । रोल्पाको माडी गाउँपालिका–२, घर्ती गाउँस्थित व्याङखोलामा भएको सवारी दुर्घटनामा परी तीन जनाको मृत्यु भएको छ। शहिद मार्गअन्तर्गत पर्ने सो स्थानमा दुर्घटनाग्रस्त बोलेरो पिकअप गाडी सडकबाट झन्डै छ सय मिटर तल खसेको छ।

बुधबार राति ११ देखि १२ बजेको समयमा भएको उक्त दुर्घटनाबारे बिहानसम्म कसैलाई जानकारी थिएन। घना जंगल र सुनसान क्षेत्रमा दुर्घटना भएका कारण घटनाको लामो समयपछि मात्रै स्थानीयले भिरमा शव देखेपछि प्रहरीलाई खबर गरेका थिए। बिहान ८ बजे स्थानीयमार्फत सूचना पाएलगत्तै इलाका प्रहरी कार्यालय घर्ती गाउँ र जिल्ला प्रहरी कार्यालयको टोली घटनास्थल पुगेको थियो।

जिल्ला प्रहरी कार्यालय रोल्पाका प्रहरी नायव उपरीक्षक (डिएसपी) पञ्चकुमार बाखुका अनुसार, घटनास्थलको भूगोल निकै कठिन र भिरालो भएकाले उद्धार कार्य निकै चुनौतीपूर्ण बनेको छ। प्रहरी र सशस्त्र प्रहरीको लामो प्रयासपछि घटनास्थलबाट श्रीमान–श्रीमतीको शव निकाल्न सफल भए पनि चालकको शव रहेको स्थानमा पुग्न कठिन भएपछि नेपाली सेनालाई गुहारिएको हो। हाल नेपाली सेनाको टोलीले घिर्नी र पुल्लीलगायतका विशेष उपकरणको प्रयोग गरी चालकको शव निकाल्ने प्रयास गरिरहेको छ।

दुर्घटनामा परी ज्यान गुमाउनेहरूमा चालक घोराही उपमहानगरपालिका-७ देसाहीका २५ वर्षीय वीरबहादुर चौधरी, दाङको दंगीशरण गाउँपालिका-७ घर भई हाल घोराही–१४ मा बस्दै आएका ४० वर्षीय जिउधन चौधरी र उनकी ३० वर्षीया श्रीमती कमला चौधरी रहेका छन्। अस्थायी नम्बर प्लेट एमएच १४ टिसीजे ४७१ को उक्त बोलेरो दुर्घटनामा परेको प्रहरीले जनाएको छ।

डिएसपी बाखुका अनुसार दुर्घटना भएको सडकको अवस्था सामान्य छ। उक्त स्थानमा कुनै अप्ठ्यारो घुम्ती वा मोड नभएकाले रातिको समयमा चालक निदाएको वा अन्य कुनै प्राविधिक कारणले गाडी अनियन्त्रित भएको हुनसक्ने प्रहरीको प्रारम्भिक अनुमान छ।

प्रहरी अभिलेखअनुसार, चालक वीरबहादुरले जेठ २० गते राति साढे १० बजे इलाका प्रहरी कार्यालय होलेरीको चेकपोष्टमा गाडी इन्ट्री गराएका थिए। उनले घोराहीस्थित ‘सिद्धबाबा सप्लायर्स’ को सामान होलेरी पु¥याउन आएको विवरण टिपाएका थिए। सोही विवरणका आधारमा प्रहरीले आफन्तको पहिचान गरी सनाखत गराएको हो। घटनाबारे थप अनुसन्धान भइरहेको प्रहरीले जनाएको छ।