पोखरा, ११ जेठ । रिलायन्स फाइनान्स लिमिटेडले आफ्नो संस्थागत सामाजिक उत्तरदायित्व अन्तर्गत पोखरा शाखामा रक्तदान कार्यक्रम सम्पन्न गरेको छ। समुदायप्रतिको आफ्नो उत्तरदायित्वलाई आत्मसात गर्दै फाइनान्सले ‘रक्तदान–जीवनदान’ भन्ने पवित्र भावनाका साथ उक्त कार्यक्रमको आयोजना गरेको हो।

नेपाल स्वयंसेवी रक्तदाता समाज कास्कीको सहकार्य तथा नेपाल रेडक्रस सोसाइटी प्रादेशिक रक्तसञ्चार सेवा पोखराको प्राविधिक सहयोगमा कार्यक्रम सम्पन्न भएको थियो।

कार्यक्रममा स्थानीय प्रतिष्ठित व्यक्तित्वहरू, बैंकका कर्मचारी तथा सर्वसाधारण रक्तदाताहरूको सहभागिता रहेको थियो। मानवीय कार्यमा योगदान पु¥याउने उद्देश्यका साथ आयोजना गरिएको उक्त कार्यक्रममा कुल ६३ जनाले रक्तदान गरेका छन्।

हाल देशभर २१ वटा शाखाहरूमार्फत आधुनिक बैंकिङ सेवा प्रदान गर्दै आएको रिलायन्स फाइनान्सले आगामी दिनहरूमा पनि समाजको हितका लागि संस्थागत सामाजिक उत्तरदायित्व अन्तर्गत यस्ता परोपकारी तथा सामाजिक कार्यहरूलाई निरन्तरता दिने प्रतिबद्धता व्यक्त गरेको छ।