पोखरा, ११ वैशाख। पोखरा महानगरपालिका वडा नं. ८ सिमलचौरमा हतियार देखाई सर्वसाधारणलाई त्रसित बनाउने दुई जनालाई प्रहरीले पक्राउ गरेको छ। नक्कली पेस्तोल र अन्य धारिलो हतियारसहित उनीहरूलाई वडा प्रहरी कार्यालय बैदामको टोलीले नियन्त्रणमा लिएको हो।

पक्राउ पर्नेमा तनहुँको व्यास नगरपालिका वडा नं. २ स्थायी घर भई हाल पोखरा–८ सिमलचौर बस्ने ३२ वर्षीय सुवास कायस्थ र ३१ वर्षीय सुरज कायस्थ रहेका छन्।

प्रहरीका अनुसार वैशाख १० गते बेलुका अन्दाजी ७ः३० बजेको समयमा केही व्यक्तिहरूले हतियार देखाई स्थानीयलाई डरत्रास देखाइरहेको भन्ने गोप्य सूचना प्राप्त भएको थियो। सोही सूचनाको आधारमा वडा प्रहरी कार्यालय बैदामबाट खटिएको विशेष टोलीले उनीहरू बस्ने कोठामा खानतलासी गरेको थियो।

खानतलासीका क्रममा प्रहरीले नक्कली पेस्तोल १ थान, पेस्तोल कभर १ थान, फलामको स्लाईड स्टिक (रड) १ थान र नोक (धारिलो हतियार) २ थान बरामद गरेको थियो ।

जिल्ला प्रहरी कार्यालय कास्कीका सूचना अधिकारी प्रहरी निरीक्षक गणेश पाण्डेका अनुसार, पक्राउ परेका दुवै जनालाई नियन्त्रणमा लिई थप अनुसन्धान प्रक्रिया अगाडि बढाइएको छ।

उनीहरूले के कस्तो उद्देश्यले हतियार राखेका थिए र अन्य आपराधिक क्रियाकलापमा संलग्नता छ वा छैन भन्नेबारे प्रहरीले सूक्ष्म अनुसन्धान गरिरहेको छ।