काठमाडौं, २ वैशाख । प्रधानमन्त्री तथा मन्त्रिपरिषद् कार्यालयमा बुधबार बसेको मन्त्रिपरिषद् बैठकले सर्वोच्च अदालतका पूर्वन्यायाधीश राजेन्द्रकुमार भण्डारीको संयोजकत्वमा पाँच सदस्यीय सम्पत्ति जाँचबुझ छानबिन आयोग गठन गर्ने निर्णय गरेको छ ।

आयोगका सदस्यहरूमा सर्वोच्च अदालतका पूर्वन्यायाधीश पुरुषोत्तम पराजुली, पूर्वन्यायाधीश चण्डिराज ढकाल, पूर्व प्रहरी नायब महानिरीक्षक गणेश केसी र चार्टर्ड एकाउन्टेन्ट प्रकाश लम्साल रहेका छन् ।

यो आयोगले २०६२/६३ देखि २०८२/८३ सम्म सार्वजनिक पदमा रहेका प्रमुख राजनीतिक पदाधिकारी तथा उच्च पदस्थ कर्मचारीहरूको सम्पत्ति विवरण संकलन, प्रमाणीकरण र छानबिन गर्ने छ ।

सरकारका प्रवक्ता तथा शिक्षामन्त्री सस्मित पोखरेलले आयोग गठनको निर्णय भएको जानकारी दिएका छन् ।

प्रधानमन्त्री वालेन्द्र शाहको नेतृत्वमा सरकार गठन भएपछि गत चैत १३ गते शासकीय सुधारसम्बन्धी १०० कार्यसूची सार्वजनिक गर्दै १५ दिनभित्र यस्तो आयोग गठन गर्ने घोषणा गरिएको थियो । उक्त कार्यसूचीको ४३ औँ बुँदामा देशमा व्याप्त भ्रष्टाचार, सम्पत्ति लुकाउने र दण्डहीनताको अन्त्य गर्न प्रधानमन्त्री तथा मन्त्रिपरिषद् कार्यालय मातहत अधिकारसम्पन्न आयोग गठन गर्ने उल्लेख थियो ।

आयोगले छानबिन प्रक्रिया कानुनी मापदण्ड र प्रमाणमा आधारित भएर निष्पक्ष रूपमा सञ्चालन गर्ने र आयोगले बुझाउने प्रतिवेदन तथा सिफारिसहरू सम्बन्धित निकायबाट कार्यान्वयन गर्ने व्यवस्था मिलाइने भएको छ ।