पोखरा, २७ चैत्र । पोखराको मालेपाटनमा जारी पहिलो संस्करणको ‘३५ प्लस भेट्रान्स सेभेन ए साइड फुटबल प्रतियोगिता’को प्रिक्वाटरफाइनल चरणका सबै खेलहरू शुक्रबार सम्पन्न भएका छन् । गण्डकी स्पोर्टस् क्लबको आयोजनामा मालेपाटन खेलमैदानमा भएको प्रतियोगितामा चारवटा प्रिक्वाटरफाइनल खेलहरूमा आयोजकसहित पाँच टिमले क्वाटरफाइनलमा स्थान बनाएका छन् ।

आजको पहिलो खेलमा आयोजक गण्डकी स्पोर्टस् क्लब ‘ए’ ले टाइटन भेट्रान्सलाई ३–० गोलले पराजित गर्दै क्वाटरफाइनल प्रवेश गरेको छ । आयोजकको जितमा गणेश कुँवर, अमृत आलेमगर र बासु जिसीले एक–एक गोल गरे ।

दोस्रो प्रिक्वाटरफाइनलमा एनके एफसीले सबिन मेमोरिय एक्स एलजी एकतालाई ३–० गोल अन्तरले पराजित गर्‍यो । एनके एफसीको जितमा मनिष थापाले दुई गोल गरे भने कन्या गुरुङले एक गोल गरे ।

तेस्रो खेलमा पोखरा १५ ले एट टु नाइनलाई २–० गोलले हराउँदै क्वाटरफाइनलमा स्थान सुरक्षित ग¥यो । पोखरा १५ को जितमा अशोक लामा र रोशन सुनारले एक–एक गोलको योगदान दिए ।

चौथो खेलमा पोखरा लायन्सले टिचर्स एफसीमाथि ५–२ गोलको फराकिलो जित हासिल ग¥यो । पोखरा लायन्सका लागि दिपेन शाही, विष्णु केसी, रोशन सुहाङ, विष्णु लामिछाने र विजय गुरुङले एक–एक गोल गरे । टिचर्स एफसीका डिटी मगर र भरत अधिकारीले एक–एक गोल फर्काए ।

अन्तिम प्रिक्वाटरफाइनल खेलमा कस्केरी भेट्रान्सले हेमजा एफसीलाई २–१ गोलले साँघुरो जित हासिल गर्दै क्वाटरफाइनलमा प्रवेश गरेको छ । कस्केरीको जितमा अन्तिम गुरुङ र लक्ष्मण महतले एक–एक गोल गरे भने हेमजा एफसीका मिलन गुरुङले एक सान्त्वना गोल गरे ।
प्रतियोगिताका संयोजक र्यामोस गुरुङका अनुसार शनिबार क्वाटरफाइनलका चार खेलहरू हुनेछन् ।

प्रतियोगिताको विजेता टिमले नगद ६० हजार रुपैयाँसहित शिल्ड, मेडल र प्रमाणपत्र प्राप्त गर्नेछ भने उपविजेताले ३५ हजार रुपैयाँसहित शिल्ड, मेडल र प्रमाणपत्र पाउनेछ ।

विधागत पुरस्कारतर्फ सर्वोत्कृष्ट खेलाडीलाई ३ हजार रुपैयाँ, उत्कृष्ट डिफेन्डर, उत्कृष्ट मिडफिल्डर, उत्कृष्ट गोलरक्षक र सर्वाधिक गोलकर्तालाई जनही २ हजार ५ सय रुपैयाँ तथा उत्कृष्ट प्रशिक्षकलाई २ हजार रुपैयाँ प्रदान गरिने आयोजकले जनाएको छ । प्रतियोगिता मालेपाटन खेलमैदानमा नै जारी रहनेछ ।