काठमाडौं, १५ चैत । नेपाली कांग्रेसका नेता तथा पूर्व ऊर्जा, जलस्रोत तथा सिँचाइमन्त्री दीपक खड्कालाई सम्पत्ति शुद्धीकरणसम्बन्धी अनुसन्धानका क्रममा पक्राउ गरी सात दिन हिरासतमा राखेर अनुसन्धान गर्न काठमाडौं जिल्ला अदालतले अनुमति दिएको छ ।

आज आइतबार बिहान मात्रै केन्द्रीय अनुसन्धान ब्यूरो (सीआईबी) ले महाराजगन्जस्थित उनको निवासबाट पक्राउ गरेका खड्कालाई म्याद थपका लागि अदालतमा उपस्थित गराइएको थियो । अदालतले अनुसन्धानका लागि आवश्यक सात दिनको हिरासत अनुमति प्रदान गरेको हो ।

गत भदौ २४ गते ‘जेनजी आन्दोलन’ का क्रममा खड्काको घरमा प्रदर्शनकारीले तोडफोड र आगजनी गरेका थिए । उक्त घटनापछि घरमा नेपाली तथा विदेशी मुद्रा जलेको अवस्थामा भेटिएको भिडियो र तस्बिरहरू सामाजिक सञ्जालमा भाइरल भएका थिए । केही प्रदर्शनकारीले सग्ला नोटहरू लगेको दृश्यसमेत सार्वजनिक भएका थिए ।

सम्पत्ति शुद्धीकरण अनुसन्धान विभागले घटनास्थलबाट जलेका नोटका टुक्राहरू र वरपरको खरानी संकलन गरी अनुसन्धान अघि बढाएको थियो । गृहमन्त्री सुधन गुरुङले सामाजिक सञ्जालमार्फत खड्कालाई जेनजी आन्दोलनका क्रममा घरबाट बरामद भएको रकमको अनुसन्धानका सिलसिलामा पक्राउ गरिएको जानकारी दिएका थिए ।

प्रहरी स्रोतका अनुसार खड्कामाथि सम्पत्ति शुद्धीकरणको मुद्दासँगै लैनचौरस्थित नेपाल स्काउटको जग्गा विवादमा पनि अनुसन्धान भइरहेको छ । सीआईबीले खड्कालाई नियन्त्रणमा लिएर थप अनुसन्धान गर्ने जनाएको छ ।