काठमाडौं, १३ चैत । राष्ट्रिय स्वतन्त्र पार्टीका वरिष्ठ नेता बालेन्द्र शाह (बालेन) नेपालको प्रधानमन्त्री नियुक्त भएका छन् ।

राष्ट्रपति रामचन्द्र पौडेलले आज उनलाई प्रधानमन्त्री पदमा नियुक्त गरेका हुन् । उनी नेपालको ४७ औं प्रधानमन्त्री बनेका छन् ।

संविधानको धारा ७६ को उपधारा १ अनुसार प्रतिनिधि सभामा बहुमत प्राप्त दलको संसदीय दलका नेताको हैसियतमा बालेन्द्र शाहलाई प्रधानमन्त्री नियुक्त गरिएको हो । नेपालको संविधान २०७२ जारी भएपछि यो धाराको प्रयोग गरी प्रधानमन्त्री नियुक्त भएको यो पहिलो घटना हो ।

काठमाडौं महानगरपालिकाको मेयर पदबाट राजीनामा दिएर फागुन २१ गतेको प्रतिनिधि सभा निर्वाचनमा भाग लिएका शाह पहिलोपटक सांसद बनेको छोटो समयमै प्रधानमन्त्रीको जिम्मेवारी सम्हाल्न लागेका हुन् । उनी नेपालको पहिलो मधेशी मूलका प्रधानमन्त्री पनि बनेका छन् ।

बालेन्द्र शाहलाई शुक्रबार शीतलनिवासमा शपथ गराइने कार्यक्रम तय भएको छ । रास्वपाले हालै सम्पन्न आम निर्वाचनमा ठूलो बहुमत प्राप्त गरेको थियो ।

शाहले आजै दिउँसो १२:३४ बजे प्रधानमन्त्रीको पद तथा गोपनीयताको शपथ लिने मिति तय भएको छ । शपथ साइतको समयबारे रास्वपाले राष्ट्रपति कार्यालयलाई यसअघि नै जानकारी गराइसकेको छ ।

राष्ट्रपति भवन, शीतल निवासमा हुने शपथ ग्रहणमा ७ वटा शंखनाद हुनेछ । त्यस्तै १०८ जना बटुकबाट स्वस्ति शान्ति वाचन र १६ जना बौद्ध भिक्षुद्वारा अष्टमंगल पाठ गराइने कार्यक्रम रहेको रास्वपाले जनाएको छ ।

फागुन २१ गते सम्पन्न प्रतिनिधिसभा निर्वाचनमा रास्वपा १८२ सिटसहित सबैभन्दा ठूलो दल बनेको छ । रास्वपाले चुनावअघि नै वरिष्ठ नेता शाहलाई प्रधानमन्त्री बनाउने उद्‍घोष गरेको थियो ।