काठमाडौं, ११ चैत । प्रतिनिधिसभाका ज्येष्ठ सदस्य अर्जुननरसिंह केसीले नवनिर्वाचित सांसदहरूलाई शपथ खुवाएका छन् ।

बिहीबार आज सिंहदरबारस्थित अस्थायी संसद् भवनको बहुउद्देश्यीय सभा हलमा आयोजित कार्यक्रममा केसीले सांसदहरूलाई पद तथा गोपनीयताको शपथ गराएका हुन् । सभामुखको निर्वाचन नभइसकेको अवस्थामा संवैधानिक प्रावधानअनुसार ज्येष्ठ सदस्यले नै शपथ गराउने व्यवस्था छ ।

शपथ ग्रहण कार्यक्रमअघि संघीय संसद् सचिवालयका महासचिव पदमप्रसाद गौतमले नवनिर्वाचित सांसदहरूलाई स्वागत गरेका थिए ।
संसद् सचिवालयका अनुसार, ६३ जना सांसदले नेपाली भाषाबाहेक आफ्नो मातृभाषामा शपथ लिएका छन् । नवनिर्वाचित सांसदहरूले आफ्नो सांस्कृतिक पहिचान झल्कने विभिन्न भेषभूषा लगाएर शपथ ग्रहण गर्न सिंहदरबार पुगेका थिए ।

स्थायी संसद् भवन निर्माण कार्य पूरा नभएकाले अस्थायी संरचनामा नै शपथ कार्यक्रम आयोजना गरिएको हो । नयाँ भवन तयार नहुँदासम्म यो अस्थायी संरचनामै संसद्का बैठकहरू बस्ने छन् ।

शपथको मुख्य अंश यस प्रकार छ :
‘म मुलुक र जनताप्रति पूर्ण बफादार रही, सत्यनिष्ठापूर्वक प्रतिज्ञा गर्छु । ईश्वरको नाममा शपथ लिन्छु कि नेपालको सार्वभौमसत्ता र राजकीय सत्ता नेपाली जनतामा रहेको छ भन्ने कुरालाई स्वीकार गर्दै, नेपालको संविधानप्रति पूर्ण बफादार रहँदै, प्रतिनिधिसभा सदस्यको पदको कामकाज प्रचलित कानुनको अधीनमा रही, मुलुक र जनताको हितमा सोझो चिताउँदै, कसैको डर नमानी, पक्षपात नगरी, पूर्वाग्रह वा खराब भावना नलिई, पदीय गोपनीयता कायम राखी इमानदारीपूर्वक काम गर्नेछु ।’