पोखरा, २१ फागुन । प्रतिनिधिसभा सदस्य निर्वाचन २०८२ को मतदान आज बिहान ७ बजेदेखि देशभर निर्वाध रूपमा सुरु भएको छ । निर्वाचन आयोगले सबै मतदान केन्द्रहरूमा मतदान प्रक्रिया सुचारु रूपमा अगाडि बढेको जानकारी दिएको हो ।

आयोगका प्रवक्ता नारायणप्रसाद भट्टराईले भने, “भर्खरै ७ बजेदेखि देशव्यापी रूपमा मतदान सुरु भएको छ । सबैतिर निर्वाध ढंगले मतदान प्रक्रिया चलिरहेको खबर प्राप्त भएको छ ।” मतदान अपराह्न ५ बजेसम्म जारी रहनेछ ।

मतदाताले मतदान गर्नका लागि मतदाता परिचयपत्रका साथै नेपाली नागरिकताको प्रमाणपत्र, राष्ट्रिय परिचयपत्र, सवारी चालक अनुमतिपत्र, राहदानी वा जग्गाधनी प्रमाणपुर्जा (लालपूर्जा) मध्ये कुनै एक सक्कल कागजात देखाए पुग्ने आयोगले जनाएको छ । यसले मतदातालाई परिचय प्रमाणित गर्न सहज बनाएको छ ।

मतदान केन्द्रहरूमा महिला र पुरुषका लागि छुट्टाछुट्टै लाइनको व्यवस्था गरिएको छ । अपांगता भएका व्यक्ति, अशक्त, वृद्धवृद्धा, बिरामी, सुत्केरी तथा गर्भवती मतदातालाई लाइनमा बस्न नपर्ने विशेष प्राथमिकता दिइएको छ ।

देशभर कुल १० हजार ९६७ मतदान स्थलमा २३ हजार ११२ मतदान केन्द्र सञ्चालनमा छन् । यसमध्ये ३ हजार ६८० अति संवेदनशील, ४ हजार ४४२ संवेदनशील र २ हजार ८४५ सामान्य मतदान केन्द्रका रूपमा वर्गीकरण गरिएको छ । यसबाहेक १४३ अस्थायी मतदानस्थल पनि तयार पारिएका छन् ।

निर्वाचनको सुरक्षा व्यवस्थाका लागि ठूलो संख्यामा सुरक्षाकर्मी परिचालन गरिएको छ । जसअनुसार ७९ हजार ७२७ नेपाली सेना, ७५ हजार ७९७ नेपाल प्रहरी, ३४ हजार ५६७ सशस्त्र प्रहरी बल, एक हजार ९२१ राष्ट्रिय अनुसन्धान विभागका कर्मचारी र एक लाख ४९ हजार ९० निर्वाचन प्रहरी खटिएका छन् । यसका अतिरिक्त दुई लाख १५ हजार सरकारी कर्मचारी मतदान प्रक्रियामा संलग्न छन् ।

यो निर्वाचन गत वर्ष भएको जनआन्दोलनपछि संसद् विघटन भएयता पहिलो पटक हुन लागेको हो । मतदातालाई समयमै आफ्नो मतदान केन्द्र पुगेर शान्तिपूर्ण रूपमा मताधिकार प्रयोग गर्न आयोगले आग्रह गरेको छ ।