पोखरा, २९ माघ । राष्ट्रिय स्वतन्त्र पार्टी (रास्वपा) का सभापति रवि लामिछानेले आगामी फागुन २१ गते हुने प्रतिनिधिसभा सदस्य निर्वाचनपछि देशको मुहार फेरिने दाबी गरेका छन्।

पोखरामा बुधबार पार्टीका कार्यकर्ताहरूसँग सम्बोधन गर्दै उनले भने– ‘नेपाली जनताले अब परिवर्तन खोजिरहेका छन्। यो चाहनालाई रास्वपाले मात्र पूरा गर्न सक्छ।’

उनले देशमा रहेको भ्रष्टाचार, बेथिति, नातावाद र कृपावाद अन्त्य गर्ने प्रतिबद्धता व्यक्त गरे। पुराना राजनीतिक दलहरूले जनताको इच्छा पूरा नगरेका कारण नै रास्वपा जन्मिएको उनको भनाइ थियो।

रवि लामिछानेले देशलाई समृद्ध बनाउन र सुशासन कायम गर्न आफ्नो पार्टी अगाडि बढिरहेको बताए। विशेष गरी स्वदेशमै युवाहरूलाई रोजगारी र उद्यमशीलताको अवसर दिने योजना पार्टीको रहेको उनले उल्लेख गरे।

उनले बुधबार नै कास्कीको लेखनाथ तालचोक र हेमजामा पनि कार्यकर्तालाई सम्बोधन गरेका थिए। कार्यक्रममा समर्थकहरूले ’रवि दाइ हाई हाई’ जस्ता नारा लगाउँदै उत्साह देखाएका थिए।

पूर्व गृहमन्त्रीसमेत रहेका लामिछानेले कास्कीका तीनवटै निर्वाचन क्षेत्रमा रास्वपाका उम्मेदवारलाई जिताउने जिम्मेवारी आफूले लिएको बताए। पार्टीले कास्कीमा क्षेत्र नं. १ मा खड्गराज पौडेल (गनेस), क्षेत्र नं. २मा उत्तम प्रसाद पौडेल र क्षेत्र नं. ३ मा बिना गुरुङलाई उम्मेदवार बनाएको छ ।

उनले मतदातालाई घण्टी चुनाव चिन्हमा मतदान गरेर आफ्ना उम्मेदवारहरूलाई जिताउन आग्रह गरेका छन्।

सभापति रवि लामिछानेसँग कास्की क्षेत्र नं. १ का रास्वपाका उम्मेदवार गनेस पौडेल ।

सभापति रवि लामिछानेसँग कास्की क्षेत्र नं. ३ का रास्वपाका उम्मेदवार बिना गुरुङ ।