पोखरा, १४ पुस । राष्ट्रिय स्वतन्त्र पार्टी (रास्वपा) र उज्यालो नेपाल पार्टीबीच पार्टी एकीकरण भएको छ । यो एकीकरणसँगै उज्यालो नेपालका संरक्षक कुलमान घिसिङ रास्वपाको उपसभापति बन्ने भएका छन् । रास्वपा सभापति रवि लामिछानेपछि पार्टीको दोस्रो वरीयतामा घिसिङ रहनेछन् ।

सोमबार भएको ७ बुँदे सहमतिमा कुलमानलाई पहिलो उपसभापति बनाउने उल्लेख छ । यसपछि डीपी अर्याल र डा. स्वर्णिम वाग्ले रहनेछन् । सहमतिमा काठमाडौं महानगरपालिकाका मेयर बालेन्द्र शाह (बालेन) र जेन–जी आन्दोलनका अगुवा सुदन गुरुङ साक्षी रहेका छन् ।

सहमतिअनुसार समानुपातिक सूचीमा उज्यालो नेपाललाई करिब १८ जनाको कोटा दिने र प्रत्यक्ष निर्वाचनमा पनि उल्लेख्य हिस्सा मिल्ने समझदारी भएको छ । रास्वपाको केन्द्रीय कमिटीमा उज्यालो नेपालले ३० प्रतिशतजति प्रतिनिधित्व पाउने भएको छ ।

यो सहमतिसँगै रास्वपाले समानुपातिक उम्मेदवारको बन्द सूची निर्वाचन आयोगमा बुझाउने तयारी गरेको छ । आगामी प्रतिनिधिसभा निर्वाचनमा बालेनलाई प्रधानमन्त्रीको उम्मेदवार बनाउने पूर्व समझदारी कायम रहेको छ तर बालेन पार्टीको कुनै पदमा नबस्ने सहमति छ ।
सहमतिको बुँदा ४ मा स्पष्ट रूपमा उल्लेख छः ’राष्ट्रिय स्वतन्त्र पार्टीको केन्द्रीय सभापति रवि लामिछाने रहने र उपसभापतिमा कुलमान घिसिङ, डीपी अर्याल र स्वर्णिम वाग्ले रहने ।’

यो एकीकरणले वैकल्पिक राजनीतिक शक्तिहरूको ध्रुवीकरणलाई बलियो बनाउने अपेक्षा गरिएको छ ।