स्याङ्जा, ११ भदौं । अपहरण तथा शरीर बन्धक कसूर मुद्दामा १२ वर्षदेखि फरार रहेका एक अभियुक्तलाई स्याङ्जा प्रहरीले पक्राउ गरेको छ। जिल्ला प्रहरी कार्यालय स्याङ्जाको विशेष अपरेसन टोलीले पोखरा–१६, छोरेपाटन (कास्की)बाट स्याङ्जा अर्जुनचौपारी गाउँपालिका–५ बस्ने ३८ वर्षीय ठाकुर बि.क.लाई पक्राउ गरेको हो।

उच्च अदालत पोखराले २०७० माघ १८ गते ठाकुरलाई अपहरण तथा शरीर बन्धक कसूरमा २ वर्ष ९ महिना ५ दिन कैद र २५ हजार रुपैयाँ जरिवानाको फैसला सुनाएको थियो। फैसला कार्यान्वयनका लागि प्रहरीले खोजी तीव्र बनाएको थियो।

प्रहरीले भदौं १० गते मङ्गलवार ठाकुरलाई पक्राउ गरी बुधवार ११ गते स्याङ्जा जिल्ला अदालतमा उपस्थित गराएको छ। उनलाई कैद भुक्तान र जरिवाना असुलका लागि कारबाही प्रक्रिया अगाडि बढाइएको जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक प्रसन्न राज चौधरीले जानकारी दिए।