पोखरा, ८ साउन । पोखरा–३२, लामेआहालमा प्रहरीले ठूलो परिमाणमा लागूऔषध गाँजा बरामद गरेको छ । मंगलबार साँझ करिब ५ बजेको समयमा पृथ्वी राजमार्गको सडक खण्डमा शंकास्पद गतिविधि देखिएपछि प्रहरीले चलाएको विशेष चेकजाँचका क्रममा यो सनसनीपूर्ण घटना बाहिर आएको हो।

जिल्ला प्रहरी कार्यालय कास्की मातहतको शिसुवा प्रहरी टोलीले पोखरातर्फ आउँदै गरेको ग ६ प १६३० नम्बरको मोटरसाइकललाई रोकेर चेकजाँच गर्दा सवार व्यक्तिको साथबाट २ किलो ९०० ग्राम गाँजा बरामद भएको छ। पक्राउ पर्नेमा गोरखा, अजिरकोट गाउँपालिका–३ का २५ वर्षीय प्रकाश गुरुङ रहेका छन्। उनले खैरो र हरियो रंगको झोलामा लुकाएर गाँजा बोकेको अवस्थामा प्रहरीको फन्दामा परेका हुन्।

प्रकाशको साथबाट गाँजासहित एकथान मोबाइल र एकहजार रुपैयाँ नगदसमेत बरामद भएको प्रहरीले जनाएको छ । उनलाई मोटरसाइकलसहित नियन्त्रणमा लिइएको छ । जिल्ला अदालत कास्कीबाट लागूऔषधसम्बन्धी कसूरमा ५ दिनको म्याद थप गरी प्रहरीले थप अनुसन्धान सुरु गरेको छ ।