काठमाडौं, २२ असार । विद्यालय शिक्षा विधेयक पारित गर्ने उद्देश्यले बोलाइएको प्रतिनिधि सभाको शिक्षा, स्वास्थ्य तथा प्रविधि समितिको आइतबारको बैठकमा सत्तारूढ दलभित्रै विवाद चुलिएको छ ।

नेपाली कांग्रेसका प्रमुख सचेतक श्यामकुमार घिमिरे र माओवादी केन्द्रकी सांसद रेखा शर्माबीच बैठकमा तीव्र भनाभन भएको हो । यसरी विधेयक पारित गर्ने भनिएको बैठक फेरि स्थगनमा गयो, र सत्तारूढ दलभित्रकै मतभेद सार्वजनिक भयो।

बैठकमा केही विषय अझै टुंगोमा नपुगेको भन्दै विधेयक पारित गर्ने निर्णय स्थगित गर्ने प्रस्ताव आएको थियो। तर, यसले समिति सदस्यहरूबीच असन्तुष्टि र अविश्वास झल्किएको देखियो।

सभापति अम्मरबहादुर थापाले सुरुमा कांग्रेस प्रमुख सचेतक घिमिरेलाई बोल्न समय दिए। तर, सांसद रेखा शर्माले समितिमा दलको प्रमुख सचेतकको हैसियतमा बोल्न दिनु गलत भएको भन्दै आपत्ति जनाइन्। “यो समिति हो, यहाँ प्रमुख सचेतकको ह्विप मान्न सकिँदैन,” उनले भनिन्।

उनको भनाइपछि सभापति थापाले गल्ती स्वीकार्दै माफी मागे। तर, त्यसपछि बोल्दै प्रमुख सचेतक घिमिरेले आफूलाई अपमान गरिएको भन्दै आक्रोश व्यक्त गरे। उनले झोला तानेर बैठकबाट उठ्ने प्रयास गरेका थिए, तर सभापति थापाले उनलाई शान्त पार्दै बस्न आग्रह गरे।

सांसद शर्माले भने, “शिक्षा मन्त्री र प्रमुख सचेतक विधेयक रोक्न चाहन्छन् भने सभापति भने पारित गरौं भन्नुहुन्छ, आखिर समिति कसको नियन्त्रणमा छ?” भन्दै प्रश्न उठाइन् । उनको आरोप थियो कि टुंगोमा पुगिसकेको विषयलाई फेरि उत्खनन् गरेर विधेयक पारित गर्नबाट रोक्ने षड्यन्त्र भइरहेको छ।

शिक्षा समितिको बैठक बारम्बार रोकिँदै समय मागिएको विषयमा गम्भीर आरोप लगाएकी छन् । उनले बैठक रोकिनुको कारण स्पष्ट नभएको भन्दै यो प्रक्रिया शंकास्पद भएको बताएकी हुन् । आइतबार बसेको शिक्षा, स्वास्थ्य तथा सूचना प्रविधि समिति बैठकमा उनले भनिन्,
“समितिको बैठक बेला–बेलामा स्थगित हुन्छ, फेरी समय मागिन्छ। किन यस्तो भइरहेको छ भन्ने कुरा बुझ्न सकिएको छैन। मलाई लाग्छ, बैठक रोकेर अरु नै धन्दा र षड्यन्त्र भइरहेका छन्।”

उनका अनुसार विद्यालय शिक्षा विधेयकमा पाँच दिनसम्म छलफल हुँदा ६०–४० को सहमति भइसकेको अवस्थामा फेरि समय माग्नु राम्रो संकेत होइन। उनले शिक्षक महासंघको मागलाई समितिले गम्भीरतापूर्वक लिएको दाबी पनि गरिन्।

सांसद सुवेदीले समितिमा दलगत हैसियत देखाउँदै राखिने भनाइको पनि आलोचना गरिन्। “समिति बैठकमा दलको हैसियत देखाएर कुरा राख्नु उपयुक्त होइन,” भन्दै उनले शिक्षक महासंघको आवाज समितिमा उठाइएको स्मरण गराइन् ।

बैठकमा उनले इसीडी शिक्षक र द्वन्द्वपीडित शिक्षकको अवस्था के भएको भन्ने प्रश्न पनि उठाइन्। साथै, विद्यालय शिक्षा विधेयकलाई यही समितिबाट अगाडि बढाउनुपर्ने माग समेत गरिन्।