पोखरा, ६ असार । अविरल बर्षाका कारण कास्कीको खिलाङ र तप्राङ गाउँ नैं जोखिममा परेको छ । वर्षाका कारण वडा नं. १ खिलाङ गाउँ र वडा नं. ६ को तप्राङ गाउँमा पहिरो जाँदा घरगोठ भत्किएका छन् ।

पहिरोको कारण पोखराको काहँुखोलादेखि दूधपोखरी सडक पनि अवरूद्ध भएको छ । खिलाङ गाउँका ३५ घरधुरीहरु पहिरोको उच्च जोखिममा परेका छन् । पोखराबाट सिक्लेस जाने बाटोमा पर्ने यो खिलाङ गाउँमा करिब १५० घरधुरी रहेका छन् ।

बिहीबार रातिदेखि परेको अविरल वर्षासँगै गएको पहिरोले तप्राङको भेडिखर्कमा स्थानीय वीरबहादुर रानाको घर पूर्ण रूपमा क्षतिग्रस्त भएको र अरू २ वटा घरलाई पनि बस्न नमिल्ने गरी जोखिममा परेको हो ।

प्रमुख जिल्ला अधिकारी रुद्रादेवी शर्मा

मादी वडा नम्बर ६ का वडाध्यक्ष दीलबहादुर क्षेत्रीका अनुसार भेडिखर्कका बिरबहादुरको घर जगबाटै पहिरो गएको र भैंसीगोठ र कुखुराको खोर पनि बगाएको छ । तप्राङकै सयपत्री टोलका सूर्यबहादुर थापाको घर, गोठ र कुखुराको खोर पनि पहिरोले बगाएको छ । पहिरोले घर गोठ भत्किए पनि मानवीय र पशुपंक्षीको क्षति भने भएको छैन ।

मादी वडा नम्बर १ खिलाङ गाउँमा पनि पहिरोले स्थानीय डुमप्रसाद गुरूङको गोठ पुरेको छ । गोठमा बाँधेर राखेका दुईवटा भैसी पहिरोले पुरेको स्थानीयले जानकारी दिए । पहिरोले पु¥याएको क्षतिका विषयमा थप विवरण भने आउन बाँकी नैं छ ।

यस विषयमा जिल्ला प्रशासन कार्यालय कास्कीका प्रमुख जिल्ला अधिकारी रुद्रादेवी शर्माले भनिन्–‘विहान ६ः३० बजेदेखि नैं यस घटनाको विषयमा जानकारी प्राप्त भएको थियो । तत्कालैं हामीले अवरुद्ध सडक सञ्चालनको लागि डोजरको प्रयोग गर्न लगाएका छौं र जोखिममा परेका घरहरुको विवरण संकलन कार्य पनि भईरहेको छ ।’

प्रमुख जिल्ला अधिकारी शर्माले जोखिममा परेका घरहरुको अवस्थाका विषयमा स्थलगत रुपमा नैं बुझ्न र उनीहरुलाई सुरक्षित राख्नका लागि आवश्यक पर्ने सम्पूर्ण तयारी गर्न सम्बन्धित निकाय, जनप्रतिनिधि र प्रहरी प्रशासनलाई निर्देशन दिईएको पनि बताईन् ।