पोखरा, ३० जेठ । नेपाल कम्युनिस्ट पार्टी (बहुमत)को विद्यार्थी संगठन अखिल (क्रान्तिकारी)का केन्द्रीय सचिव तथा गण्डकी प्रदेश इञ्चार्ज प्रेम प्रशान्त बोहराले न्यायाधीशलाई जहाँ कालोमोसो छ्यापिएको थियो, त्यहाँ गोली पनि पड्किन सक्ने चेतावनी दिएका छन् ।

कांग्रेस पूर्वसांसद आफताब आलमलाई सफाइ दिने उच्च अदालत जनकपुर, अस्थायी इजलास वीरगन्जका न्यायाधीश खुसीप्रसाद थारुमाथि कालोमोसो दलेको प्रसङ्गमा बोल्दैं विद्यार्थी नेता बोहराले इजलासमा पुगेर भ्रष्टाचारीहरुलाई सांकेतिक रुपमा कारवाही गरिएको बताए ।

न्यायाधीशलाई कालोमोसो दलेको आरोपमा प्रहरीले नेकपा (बहुमत)का तीनजना नेता तथा कार्यकर्ताहरुलाई पक्राउ गरेको थियो । पक्राउ परेका नेता तथा कार्यकर्ताहरुको रिहाईको माग गर्दै पोखरामा शुक्रबार राति मशाल जुलुश प्रदर्शन गरिएको हो। पोखराको जाल्पारोड, सिर्जनाचोक, सभागृहचोक हुँदैं मशाल जुलुश पृथ्वीचोकमा पुगेर कोणसभामा परिणत भएको थियो ।

अखिल (क्रान्तिकारी)का केन्द्रीय सचिव प्रेम प्रशान्त बोहरा

कोणसभामा बोल्दैं प्रदेश इञ्चार्ज बोहराले भ्रष्टाचारी, दलाल, मिटरव्याजी, घुसखोर लगायत राष्ट्रघातीहरुलाई कडाभन्दा कडा कारवाही गर्ने चेतावनी दिए । उनले पोखरा महानगरपालिकाको वेथिति, फेवातालको मापदण्ड कार्यान्वयनमा भएको चलखेल र पातले छाँगो (डेभिज फल्स)को ठेक्कापट्टा लगायतका विषयमा चलखेल गर्नेहरुलाई नेकपा (बहुमत)ले नजिकबाट नियालिरहेको बताए ।

जिउँदै मानिसलाई इट्टाभट्टामा जलाएर हत्या गर्ने पूर्वमन्त्री आलमलाई सफाई दिने न्यायधीश थारुलाई कालोमोसो दलेको आरोपमा प्रहरीले केन्द्रीय सदस्यहरु अविनाश, पदम र सिरहा जिल्ला सचिवालय सदस्य गर्भू महतोलाई पक्राउ गरेको छ ।

शुक्रबार आयोजना गरिएको मशाल जुलुशमा नेकपा (बहुमत)का केन्द्रीय सदस्य सबिन ओली, विद्यार्थी संगठन अखिल (क्रान्तिकारी)का केन्द्रीय सचिव तथा गण्डकी प्रदेश इञ्चार्ज प्रेम प्रशान्त बोहरा, क्रान्तिकारी युवा संगठन नेपालका केन्द्रीय सचिव लोकेन्द्र राई, अखिल (क्रान्तिकारी)का केन्द्रीय सचिवालय सदस्य तथा गण्डकी प्रदेश संयोजन राजन साउद र क्रान्तिकारी युवा संगठनका केन्द्रीय सदस्य सूर्य परियार लगायत जिल्लाका नेता कार्यकर्ताको सहभागिता रहेको थियो ।