यो मुद्दाले नेपालको न्यायप्रणाली, राजनीतिक हस्तक्षेप र पीडितको न्यायप्रति विश्वासमाथि प्रश्न चिन्ह खडा गरेको छ । आलम पुनः राजनीतिमा सक्रिय हुने अवस्थासँगैं पीडित परिवारजनहरुमा झनैं सन्त्रास छाएको छ ।

रौतहट, १५ जेठ । जिउँदै मानिसलाई इँटाभट्टामा जलाएर हत्या गरेको अभियोगमा जिल्ला अदालतले जन्मकैद सुनाएका कांग्रेस नेता तथा पूर्वमन्त्री मोहम्मद अफताब आलमलाई उच्च अदालत जनकपुरले बुधबार सफाइ दिएको छ ।

जिल्ला अदालतको फैसलालाई अन्यायपूर्ण ठानी उच्च अदालतमा अपील गरेका आलमलाई न्यायाधीश खुसीप्रसाद थारू र अर्जुन महर्जनको संयुक्त इजलासले सफाइ दिने निर्णय गरेपछि उनी ललितपुरको नक्खु जेलबाट आलम बुधबार साँझ रिहा भएका छन् ।

२०६४ चैत २७ गते संविधानसभा निर्वाचन (रौतहट–२) अघिल्लो दिन, कांग्रेस नेता आलमको निर्देशनमा चुनावमा बम बिष्फोट गराएर विपक्षी र मतदातालाई तर्साउँदैं वुथ नै कब्जा गर्ने उद्देश्यले बम बनाउन लगाएका थिए । त्यहीं क्रममा केही व्यक्तिले राजपुर नगरपालिका वडा नं. २ मा रहेको आलमको काकाको घरमा बम बनाउनेदेखि त्यसलाई ओसार्ने काम गरिरहेका थिए ।

सोही क्रममा दुर्घटनावश बम बनाउने ठाउँमा नै पड्के पछि दुई नेपाली युवा त्रिलोकप्रताप सिंह “पिन्टु“ र ओसी अख्तर सहित २० जना भारतीय नागरिक घाईते भएका थिए । आलमले घटना बाहिर नआओस् भनेर घाइतेहरूलाई बेहोस पारेर ट्रयाक्टरमा राखी इँटाभट्टामा हालेर जलाएका थिए ।

रौतहटको राजपुरमा भएको यस घटनामा संलग्न रहेको भन्दैं कांग्रेस नेता आलमसहित चार जनालाई जिल्ला अदालत रौतहटले २०८१ वैशाखमा जन्मकैदको फैसला सुनाएको थियो । जन्मकैदको सजाय पाउनेहरूमा कांग्रेस नेता आलम, उनका भाइ मोहम्मद महताब आलम, शेख सराज र बद्री सहनी रहेका छन् ।

नेपाली कांग्रेस सभापति शेरबहादुर देउवाले पाँचवर्ष अघि देखि नै आलमलाई छुटाउने आश्वासन दिदैं आईरहेका थिए । यस्तो अवस्थामा कांग्रेससँग राजनीतिक सम्बन्ध रहेको आरोप लागेका न्यायाधीश खुसीप्रसाद थारुसहितको इजलासले कांग्रेस नेता अफताब आलमलाई सफाई दिएको हो । न्यायाधीश थारुले यसअघि भ्रष्टाचारमा संलग्न नेपाली कांग्रेसका नेता विजय गच्छदारलाई पनि सफाइ दिएका थिए ।

उच्च अदालतले बम विस्फोटको ठोस प्रमाण नभएको, घाइतेहरू इँटाभट्टामा जलाइएको विश्वसनीय सबुत नपुगेको र फरेंसिक रिपोर्टले पनि हत्या पुष्टि गर्न नसकेको भन्दैं कांग्रेस नेता अफताब आलमलाई सफाई दिएको थियो ।

यस घटनाले पीडित परिवारले यो फैसला न्यायको हत्या भन्दैं आलोचना गरेका छन् । इँटाभट्टामा जलाईएका पिन्टुका बुबा श्रीनारायण सिंहले उच्च अदालतले न्याय दिन असफल भएको र अब सर्वोच्च अदालतमा जाने बताएका छन् ।

यसअघि विस्फोटको घटनामा मारिएका ओसि अख्तरकी आमा रुक्सानको समेत प्रमाण लुकाउनका लागि गोली हानी हत्या गरिएको थियो । २०६७ माघ ८ गते माईतीबाट आफ्नो घर सरुअठा आउँदै गर्दा अज्ञात समूहले रुक्सानाको गोली हानी हत्या गरेका थिए । रुक्साना हत्याको घटनावारे ओपन सेक्रेट हुँदा हुँदैं पनि प्रहरीले आजसम्म केही गर्न सकेको छैन ।

यो मुद्दाले नेपालको न्यायप्रणाली, राजनीतिक हस्तक्षेप र पीडितको न्यायप्रति ‘विश्वासमाथि प्रश्न चिन्ह’ खडा गरेको छ । आलम पुनः राजनीतिमा सक्रिय हुने अवस्थासँगैं पीडित परिवारजनहरुमा झनैं सन्त्रास छाएको छ ।