पोखरा, १३ जेठ । नेकपा एमाले निकट राष्ट्रिय युवा संघको पाँचौ महाधिवेशनबाट पुनः क्षितिज थेबे अध्यक्षमा विजयी भएका छन् । प्रधानमन्त्री केपी शर्मा ओली पक्षधर थेबेको प्यानलैं विजयी भएको हो । आज मंगलबार विहान भएको मतदानसँगैं भएको भर्खरै प्राप्त मत परिणाम अनुसार ओली पक्षका थेवे १८८ मतान्तरले विजयी भएका हुन् ।

क्षितिजकै नेतृत्वमा सर्वसम्मत गर्न प्रधानमन्त्रीको निर्देशनसँगैं नेताहरूले कसरत गरेको भए पनि सुमन पुरीले चुनावी मैदानमा उत्रिने अडान लिएपछि मतदान भएको थियो ।  थेबेले ७९७ ल्याउँदा उनका निकटतम् प्रतिद्वन्द्वी पुरीले ६०८ मत ल्याएका छन् । पुरी निवर्तमान राष्ट्रपति विद्यादेवी भण्डारी पक्षका युवा नेता हुन् ।

यस्तै युवासंघको महासचिवमा ७५५ मत ल्याउँदै महेश चौलागाईँ विजयी भएका छन् । उनका प्रतिस्पर्धी ६४९ मत ल्याएका छन् । १ हजार ७६४ मतदाता प्रतिनिधि रहेकोमा १ हजार ४०४ मत खसेको थियो ।

थेबे प्यानलबाट उपाध्यक्षमा महाराज गुरुङ र विनय शाह, महासचिवमा महेश चौलागाईं, उपमहासचिवमा उपेन्द्र शाही, सचिवमा मदन भण्डारी र पुरी प्यानलका अरुण कुँवर, महिला सचिवमा निशा लिम्बु सुब्बा, मधेसी सचिवमा मोबिन अख्तर आलम विजयी भएका छन् ।

अनुशासन आयोग अध्यक्षमा महमद निजामुदिन (निजाम), निर्वाचन आयोग अध्यक्षमा मदन गिरी, लेखा आयोग अध्यक्षमा कृष्णदत्त जैसी, युवा विज्ञ परिषद्मा चीन लामा निर्वाचित भएका छन् । पुरी प्यानलबाट उपाध्यक्षमा प्रकाश गौतम र पर्वत भण्डारी, महासचिवमा कुबेर अधिकारी, उपमहासचिवमा खेमराज शर्मा, सचिव खुलामा अरुण कुँवर र ध्रुव खड्का, महिला सचिवमा रेशु तामाङ, मधेसी सचिवमा चितरञ्जन यादव उम्मेदवार थिए ।

महाधिवेशनमा पदाधिकारी र सदस्यमासमेत गरेर ३ सय ९९ जनाको उम्मेदवारी परेको थियो । पदाधिकारी ९ जनासहित १ सय ५१ जनाको केन्द्रीय समिति, ४ वटा विभागमा अध्यक्ष, उपाध्यक्ष र सचिव गरेर १ सय ६३ पदमा निर्वाचित हुनेछन् ।

यस अघि संघको अध्यक्षमा क्षितिज थेवे र महासचिवमा सुमन पुरी रहेका थिए । नेपालगन्जमा भएको नवौं राष्ट्रिय महाधिवेशनमा पनि नेतृत्वका लागि सहमति नभएपछि निर्वाचन नैं भएको भएको थियो ।