काठमाडौं, २८ वैशाख । राष्ट्रिय जनमोर्चाका सांसद चित्रबहादुर केसीले कालीगण्डकी नदीमा जनप्रतिनिधि र कर्मचारीको मिलेमतोमा अवैध उत्खनन भएको भन्दै सरकारको ध्यानाकर्षण गराएका छन् ।

आइतबार प्रतिनिधि सभाको शून्य समयमा बोल्दै प्रतिपक्षी दलका सांसद केसीले आफुले त्यसबारेमा यसअघि नै जानकारी गराएको तर सरकार रमिते भएर बसेकोमा दुःख व्यक्त गरे ।

सर्वोच्च अदालतले समेत कालीगण्डकीको बालुवा नझिक्नु भन्ने आदेश जारी गरे पनि भ्रष्ट जनप्रतिनिधि कर्मचारी मिलेर कालीगण्डकीको दोहन खुलेआम गरिरहेका छन् ।

‘कालीगण्डकीमा बालुवा झिक्ने काम यति बढी भइरहेको छ । जनप्रतिनिधि र कर्मचारी मिलेर बालुवा झिकेको झिकैं छन् । त्यहाँ केही लाग्दै लागेन । सरकार रमिते भएर हेरिराखेको छ,’ उनले भने ।

सांसद केसीले बालुवा गिटी उत्खन्न रोक नलगाए कालीगण्डकी करिडोरको बाटो समेत भासिने स्थिति रहेको भन्दैं राज्यका सम्बन्धित निकायले तत्कालै कडाईपूर्वक यो गलत धन्दालाई रोक्नुपर्ने बताए ।