पोखरा, २० असोज । भुर्जुङखोलाबाट पोखरातर्फ अवैधरुपमा कटपिस ढुङ्गा चोरी निकासी गरी ल्याउँदैं गरेको साधनलाई प्रहरीले नियन्त्रणमा लिएको छ । वडा प्रहरी कार्यालय रामबजारले पोखरा–१६, मध्यमपथ चोकस्थित सडक खण्डमा भुर्जुङखोलाबाट पोखरातर्फ आउँदैं गरेको ग१ख ७२३४ नम्बरको मिनी टिप्परलाई नियन्त्रणमा लिएको हो ।

माछापुच्छ्रे गाउँपालिका अन्तर्गतको अन्नपूर्ण संरक्षण क्षेत्रबाट नदिजन्य पदार्थहरु अवैध रुपमा चोरी निकासी भईरहेको गोप्य सूचनाको आधारमा आइतबार राति साढे ११ बजेको समयमा चेकजाँच गर्ने क्रममा कटपिस ढुङ्गा विना कागजपत्र र अनुमति ल्याईएको भेट्टिएको थियो । प्रहरीले तत्कालै कटपिस ढुङ्गाहरु सहित टिप्पर नियन्त्रणमा लिएर थप अनुसन्धान र कारवाहीका लागि अन्नपूर्ण संरक्षण क्षेत्र सम्पर्क कार्यालय हरियोखर्कमा पठाईएको जिल्ला प्रहरी कार्यालय कास्कीले जानकारी दिएको छ ।